No.1439/2020-2021

Food, Civil Supplies & Consumer Affairs, LAD leh Fisheries Department – te changtu Minister Pu K. Lalrinliana chuan vawiin khan Lunglei rawn thlengin Lunglei District-a a Department chan hnuaia hmun pawimawh te a tlawh. Lunglei HPC Vice Chairman Pu Lawmawma Tochhawng leh official-te leh party hruaituten an tawiawm a ni.

Minister leh amah zuitute hian Laldenga Park, Pukpui leh Zobawk ah District LAD Park tlawhin Lunglei DLAO Pu J. Miahlung leh a thawhpuiten an lo dawngsawng a. Heng Park dinhmun leh hmunhma te enfiahin a chei that dan tur leh mipui tam zawk, a bik takin khualzin mite hipna tura hmalak dan tur te sawihovin ruahmanna a siam pui a ni. District Park, Zobawkah hian outdoor shooting range bakah swimming pool awm sa siam that tum a ni. Minister hian vawiin vek khan Lallianvung Park Hmuifang, Thenzawl LAD Park te tlawhin Department thawktute nen hmalakna kal mek leh hmachhawpte an sawiho a ni.

Hemi hnu hian Fisheries Department hnuaia sangha chi siam chhuahna hmun Fish Seed Farm, Zobawk pawh tlawhin hmalak tul te a hmunah a enfiah a. Fish Seed Farm chu Fish farming ti hmasawn zel tur leh sangha tharchhuah lama kan intodelh theihna tura hmun pawimawh tak a ni tiin he farm ti changtlung zel tura hmalak a ngaih pawimawh thu a sawi a. Helai hmuna sangha tih keuna - hatchery ti changtlung turin cheng nuai 5 ruahman nghal a nih tur thu thawktute a hrilh a ni. 

Minister hian vawiin vek khan Luangmualah FCS&CA Department Godown a tlawh a. Department hnathawkte chu an inrelbawl dan leh inkaihhruaina bakah hmasawn zel tura an mamawhte a sawipui a. Helai hmuna thawktute hian an harsatna leh mamawhte lo thlenin, a tul anga hmalak sak a tum thu Minister hian a sawi. 

Godown a tlawhnaa inkhawm tawi neihah FCS&CA Minister chuan thu sawiin Covid-19 avanga lockdown kalpui mekah FCS&CA Department hnathawktuten an mawhphurna tha taka hlen chhuakin buhfai, gas leh oil ah te tun thlengin harsatna kanla neilo hi a lawmawm takzet a ni tiin, Department hnathawktute chungah lawmthu sawiin theihtawp chhuah chhunzawm zel turin a fuih a. Sawrkarin kan ram tharchhuah buhfai lei duh hle mahse lei tham kanla tharchhuah loh avangin ram pawn atanga kan lakluh angaia, kan neih chhun chhung te erawh kan ren thiam a ngai tiin keimahni tharchhuah ngei leitur kan neih ve thuai theihnan sawrkar chuan Agriculture lamah nasa takin tan a la ani, a ti. Hetihlai hian ram pawn atanga buhfai kan lakluh ah buhfai chhia te paw halo awm palh thei a, buhfai chhia alo awm palh anih pawhin mipuite hnenah tumahin hralh chhuah loh tur a ni tiin, NABARD loan hmangin godown 21 sak a nih tur thu leh Tender chhuah tep a nih thu Minister hian sawiin Godown bakah hian thawktute quarter leh toilet sak tel vek a ni ang, a ti bawk. Eirawngbawlna Gas-a Mizoram a intodelh theihnan nasa taka hmalak a nih thu leh Meidum bulah Gas laihchhuah beiseia SEDP sum hmanga thui tak hmalak a nih tawh thu a sawi bawk a ni. 

Luangmual Godown hnathawktute hian Buhfai Quintal 9600 a awm mek thu leh Lunglei District chhung Centre 15-ah te July thla thleng daih tur buhfai chhek khawl vek a nih thu Supply Minister hnenah hian anlo report a ni. 

Supply Minister hian Godown a thawktute hman tur Mask leh Hand Sanitizer thahnem tak a hlan a ni.