No.3753/2021-2022

Aizawl the 21st January 2022: Vawiin khan Pu K.Lalrinliana, Minister of State, Food, Civil Supplies and Consumer Affairs Department, Kolasib Assembly constituency bialtu MLA ni bawk chuan MLA-LADS hmanga sak zawh tak, Community Hall, Meidumah a hawng a. Meidum Volleyball Association leh VC tangkawp a sak Volleyball Court a hawng nghal bawk a ni. Tlawng lui luangin lei a lak avanga Bairabi hmun thenkhat a harsatna thleng thin chu a hmun ah enin PWD-a thawktute leh Bairabi khawtlang hruaitute nen hmalak dan tur an sawiho nghal bawk a ni.

Minister Pu K.Lalrinliana chuan Sawrkar atanga puihna awm ang angte, khawtlang rotling neih nana tangkai tak a Meidum khawtlangin an hmang chu lawmawm a tih thu sawiin Sawrkar puihna bak a anmahni phak tawk a thahnemngai tak a an chêi chhunzawm dan te chu fakawm a tih thu Meidum Community Hall hawnna inkhawm ah hian a sawi. Sawrkar atanga tanpuina beisei lova khawtlang hruaitute hmalakna a Volleyball court hawn theih a an sa puitling chu entawntlak a tih thu Minister chuan sawiin khawtlang hruaitute inpekna chu ropui a tih thu a sawi bawk a ni.

Community Hall, Meidum hawnna inkhawmah hian Dr.H.Lalthlangliana, Deputy Commissioner pawhin thu sawiin hrileng dona kawng a khawtlang hruaitute hmalaknaah lawmthu a sawi a, hrileng lak a khawtlang himna tur chuan mimal tinin fimkhurna an ngaih pawimawh hmasak theuh a tul thu a sawi bawk a ni.

Pu K.Lalrinliana hian Bairabi South-a Futsal khelmual sak mek te, Meidum Football field laih mek te leh Meidum thlamual thar tur hmun te a tlawh a. Pu Lalrinngheta, EE, PWD, Pu Timothy R.Lalhmangaiha, BDO Bilkhawthlir leh Pu Hmingthanzuala, DIPRO, Kolasib ten an tawiawm a ni.

Pu R.Lalrinawma, Chairman, Joint VC, Bairabi tarlan danin Kum 1970 atanga vawiin thleng hian Bairabi hmun thenkhat ah Tlawng luiin lei a lak avang hian in 80 bawr vel a chhe tawh a, heng zingah hian mimal in bak ah Sawrkar Quarter, Biak in, School leh naupang enkawlna Home-te a tel a ni. Lui kam a lei tlak belh tur dalna, Anti-Erosion Work thawh nan hian NABARD atanga cheng Nuai 1000 hmangin Phase -I, 1.2 KM a thui sak tur a hmalak mek a ni.