1184/2023-2024

Aizawl, 19th July, 2023 : Minister Pu Lalruatkima, Aizawl West-II bialtu MLA ni bawk chuan tukin khan a bial chhung veng hrang hrang- Kanan Veng, Vaivakawn, Dawrpui Vengthar, Dinthar Veng, Tuikual North leh Tuikual South a High-mast dahna tur a en kual a, minister hi Aizawl Deputy Mayor Pu R. Thanglura, AMC Ward–XIII Corporator Pu Lalfakzuala Chenkual leh Aizawl Smart City Ltd. CEO Pu CC Lalchhuangkima ten an tawiawm a, heng veng hrang hrangahte hian Local Council hotute leh khawtlang hruaituten lo dawngsawngin high-mast phunna tur hi an enho a ni.

Pu Lalruatkima chuan Aizawl Smart City Ltd kaltlanga ni zung chakna hmang “solar mini high-mast” chu veng chhung himna kawngah leh vengchhung mawina kawngah pawh tangkai tak tur a ni a ti a. High-mast chu a tul dana zirin pakhat aia tam pawh dah theih tura hmalak a ni a ti bawk.

Aizawl Smart City hnuaia high-mast dan tur hi feet 30 vela sang tur a ni a, ban pakhatah hian solar plate 4 leh electric light 80w 4 theuh a awm dawn a ni.

Pu Lalruatkima hian HSLC 2023 a pakuana dinhmun hauhtu Esther Zorinhluzuali d/o K. Lalengzuala, Tuikual North chu tlawhin lawmpuina thilpek atan “laptop” a hlan nghal bawk a ni.