756/2023-2024

Aizawl, the 10th June 2023 : Nizan khan Dinthar Local Council leh Dinthar Branch YMA buatsaihin Dinthar Veng chhunga HSLC, HSSLC pass thar te leh kawng hrang hranga veng chhung mi hlawhtling te lawmpuina hun an buatsaih a. He hunah hian Information and Public Relations Minister Pu Lalruatkima, bialtu MLA ni bawk chu khuallian a ni.

Pu Lalruatkima chuan HSLC, HSSLC pass thar te leh eizawnna kawng hrang hranga hlawhtlinna chang te a lawmpui takzet thu sawiin duhsakna a hlan a. Tunlai khawvel thiamna sang chak takah inelna pawh a sang chak a, engpawh ti ila tihtakzetna leh taimakna tello chuan hlawhtlinna tak tak a chan theihloh, a ti a. Pianpui finna nei tha tak pawh taimakna in a zui loh chuan a hlawhtlin hleitheih loh a, thiam theih ringawt hian daih chin a nei a, hlawhtlinna tak tak chu taimakna a ni tih hre turin zirlai hlawhtling thar te Minister chuan a fuih a ni. Hna hmu thar te pawh fuihin Pu Lalruatkima chuan mipui rawngbawltu an nih angin mipui tan harsatna siamtu ni lova, mite tana malsawmna thlen tu, mipui rin ngam, nungchang tha nei turin a chah a. Mihring te hi inzir reng tur kan ni tih hria a an hnawthawhnaah pawh mi inzirpeih leh thil thar hre chak mi nih tum turin a fuih. Hlawhtlinna chang ve ta lo te Minister chuan tawrhpui a, beidawng mai lo va hmalam pan zel tura fuihin hlawhchhamna hi hlawhtlinna rahbi a ni tih hriaa, tang nasa leh zual turin a chah a ni. Pu Lalruatkima chuan Dinthar Vengin hma a sawn chak zia sawiin, Dinthar Veng chu a  bial chhunga veng hmasawn berte zinga mi nia a hriat thu a sawi a. He veng atang hian mi hmingtha tam tak an lo chhuak tawh a, hnathawh that vanga rampum huap chawimawina hial dawng pha an awm chu chhuanawm a tih tak zet thu a sawi a ni.

Aizawl Deputy Mayor Pu R Thanglura pawhin zirlai hlawhtling thar te leh eizawnna kawnga hlawhtlinna chang thar te a lawmpui thu a sawi a. Dinthar khawtlang tana mi tangkai, ram leh mipui tana malsawmna nih tum a, rinawmna leh taimakna nen an hun te hmang zel turin a fuih a ni.

Zirlai pass tharte bakah hian Dinthar Veng tihmingthatute zinga mi Pi Zopari, Florence Nightingale Award dawngtu leh Pu H. Rotluanga (Comedian) bakah gazetted officer-a tling thar te hnenah chawimawina thilpek hlan a ni bawk.

Class X leh Class XII pass tharte thilpek atan Pu Lalruatkima, bialtu MLA chuan 'ZIRNA LAMTLUANG' tih lehkhabu a sponsor a. Pi T. Sawiveli te chhungkuain an pa Pu Lalvunga hriatreng na’n Class XII pass tharte tan Holy Bible an sponsor bawk a ni.

He mi zana Class X pass thar lawmpuina pek zawng zawng hi  mi 82 an ni a,  Class XII pass thar mi 91 an ni.

Programme hi Dinthar Local Council Chairman Pu R Lalawmpuia’n a kaihhruai a. Pu T Lalhmachhuana, MJS; Pu Zarzoliana, MPS leh Pi Helen Saibuangi, MES ten fuihna thu an sawi a. Lawmpuina hlanna hun hman zawh hnuah Pu Lalnuntluanga, YMA President chuan lawmthu sawiin hun hnung a khar a ni.