Vawiin khan  Hausiampa Hall, Haulawngah Horticulture Department hnuaia NLUP 3^rd and 4^th Phase chu Haulawng Circle-a beneficiary te hnenah Rs. 94,74,943/- tanpuina sem a ni. Horticulture Minister leh bialtu MLA ni bawk Pu PC Lalthanliana chuan khuallian niin he tanpuina sem inkhawm hi a hmanpui.

Pu PC Lalthanliana chuan District Horticulture Officer leh staff ten ruahmanna fel tak neia NLUP semna programme an buatsaih chu lawmawm a tih thu sawiin beneficiary kalkhawmte chu lawmpuina thu leh duhsakna a hlan a.  NLUP chu kuthnathawktute hmakhua ngaia duan chhuah a ni tiin Pu PC Lalthanliana chuan kuthnathawka eizawngtute chu hmathlir thui tak nei chunga taima tak leh rilru nei taka an hun tha hmang tangkai turin a chah a. Sorkarin mi taima leh thahnemngai te a tanpui zel dawn tih sawiin, Sawrkarin NLUP a kalpui zel dawn bakah NEDP Convergence hnuaiah tanpuina sem chhunzawm a nih tur thu a tarlang bawk.

Vawiin NLUP semna inkhawm hi Lunglei DHO Pu Vanlalnuntluanga Renthlei in a kaihruai a, Pu C. Lalremsiama, Asst. Divisional Horticulture Officer-in technical report a pe a. Vawiin NLUP tanpuina sem hi a zavaiin Rs. 94,74,943/-  a ni.    

Horticulture Lunglei Division hnuaiah NLUP 1^st Phase ah beneficiary 1289, 2^nd Phase ah beneficiary 1822, 3^rd phase ah beneficiary 988 leh 4^th Phase ah beneficiary 567 awmin serthlum, lakhuihthei, kuhva, sapthei, iskut, tung leh thingpui trade thlang te an ni a. Horticulture hnuaia NLUP beneficiary te hnenah sawrkarin Thlai tiak Seedling leh Budling a sem thin bakah Geomembrane (Tuipuan), leh Neem Kasto (Leitha) te an dawng bawk a ni.