Vawiin chawhma khan Thingsulthliah Higher Secondary school ah National Institute of Electronics and Information Technology Study Centre hawnna hun hman a ni a, Pu R Lalzirliana, Power & Electricity department minister chu khuallian niin he hun hi a hmanpui.

Minister Pu R Lalzirliana chuan NIELIT Study Centre hnuaia Computer Laboratory hawng thei a Thingsulthliah Higher Secondary school a thawktute thawhrimna leh inpekna chu fakawm a tih thu a sawi a,” Zirna In ropui te, zirna hmanraw changtlungte aia pawimawh hmasa chu zirlaite leh zirtirtute tum ruhna leh thawhrimna hi a ni,” a ti a,” Ziak leh chhiar thiam kawnga hma kan sawn rual hian Digital Literacy ah pawh hma sawn kan tum ve tur a ni,” a ti bawk. Pu Lalzirliana chuan computer hmelhriat a, a hmanna kawnga thiamna neih chu zirlaite bakah sawrkar hnathawk, kut hnathawktute leh kum lama upate thlengin tangkai taka hman tum a tul thu sawiin,” Mizoram sawrkar pawhin a theihna apiangah computer Application a hmang chho zela, awlsam zawk a sawrkar leh mipui kan indawr tawn theih nan hma lak zel niin Electric bill pawh online a pek theih a ni tawh a ni,” a ti bawk.

NIELIT Director Aizawl, Pu T Gunendra Singh chuan Digital Literacy pawimawhnate sawiin Study Centre hnuaia Course hrang hrang zir theih te a tar langa, SC leh ST tan a zirna man chawi a ngaih loh thu sawiin zirlai tam thei ang ber te chu study centre tangkai taka hmang a Course awm ang angte zir ngei turin a chah bawk.

Vawiin NIELIT Study Centre hawnna hun hi Pu Lalsawmliana,VCP in a kaihruaia Pu C Lalngaihzuala’n kalkhawmte lawmna thu sawiin Pu R Lalfakawma, Principal Thingsulthliah HSS in report a pe bawk a ni.

NIELIT study centre Thingsulthliahah hian computer 15 dah niin zirtirtu 1 in a enkawl dawn a, Course on Computer Concepts zirna kalpui tur niin kum khatah course cycle 4 nei hman tura ngaih a ni.

Minister Pu R Lalzirliana hian NIELIT Study centre Thingsulthliah HSS a hawn zawh hian Upate Run, Seling hawnna hun a hmanpui leh a, chhungkua leh khawtlang inkaihruainaah Upate pawimawh zia sawiin, thangtharte kawng dik kawhhmuhtu leh rorelna leh thutlukna felfai siam kawnga pawimawh em em te chu upate an nih thu a sawi a, khawvel hmasawnna ina a ken tel computer thiamna ang chi ahte pawh phak tawk a in tuai hrim zel turin a fuih bawk.

Upate Run, Seling hi MLA fund Cheng nuai 6.1 seng a sak a ni.