Vawiin October 3, 2019 Ningani hian Mizoram Secondary School Teachers’ Association (MISSTA) Annual General Conference 2019 chu Synod Conference Centre Aizawlah neih a ni a, School Education Minister Pu Lalchhandama Ralte chuan he conference hi a hmanpui.

Pu Lalchhandama Ralte chuan High School zirtirtu kalkhawmte chu kan ramin a mamawh Quality Education pe turin a chherna pum chu zirna in a ni a, zirna tha leh tluantling nei turin inpekna a pawimawh a ni a ti. Zirna in tha nei turin punctuality ngai pawimawh turin zirtirtute chu a chah a, zirtirtu dinhmun zahawm tak vawng nung leh turin zahawm taka inthuam turte, sorkar hnathawk dang aia an ropuina leh zahawmna vawng nung turte, zirna leh a environment-in hma a sawn theih nan puanven sawi chhing turtein a sawm a, zirna kawngah rahbi kan rah dik chuan kan ramin kawng dik a zawh ang, a khawlpui ber a chhiat erawh chuan awmzia a awm lovang, kan ram kan hnam a dam nan zirnaah tan kan lak a ngai a ni a ti.

Mizoram sorkarin thla 9 chhungin zirna kawngah thil tam tak a ti hman a, hnalak kalpui mek MR teacher 881 te, IV grade 54 te bakah High School Headmaster post 76 hnawhkhah tur a awm a, tunah hian High School zirtirtu post ruak 273 hnawhkhat turin DP&AR ah buaipui leh mek a ni a,  educationa a thawhpuite nen an thawh chhoh zelnaah phur takin an thawk mek tih a sawi.

Mizoram Education Service chu sorkarin a vei hle a, service mumal kan neih loh avang hian inspecting-ah indaih lohna a lian hle a, transfer & posting rules pawh Assembly session a pass turin buaipui mek a ni  a, chinfel thuai anih theih nan sorkarin ke a pen mek a ni a ti.
    
MISSTA Annual General Conference-ah hian chawhma lamah report an ngaithlaa, an pawl hmalakna tur ro an rel a, chawhnu lamah National leh State Award dawngte lawmpuina an hlan a, an member superannuation pension a chhuak mi 46 te an thlah a, an member thi 7 sunna hun an hmang bawk.
   
MISSTA Annual General Conference-ah hian District tin Sub-Hqrs hruaitute, member school aiawh te leh Aizawl khawpui chhung member zawng zawng te an tel a ni.