Vawiin khan BNRGSK Hall P&E Veng, Serchhipah Mizoram Board of School Education (MBSE) buatsaihin Serchhip District chhunga High School leh Higher Secondary School zirtirtute tan Training on Question Setting Technique tih thupui hmangin training buatsaih a ni.

Pu Lalthangbika, Secretary, MBSE chuan inlawmna thu sawiin, Pi Sangchhin Chinzah, District Bawrhsap chuan Training hi a hawng a ni.
 
Mizoramah Board Exam pass percentage kum tinin a sang a, chutihrualin Mizo zirlaite India ram chung hmun dangte leh ram pawna zirlai dangte nena in elnaah a ti thalo leh a hniam zawkah an tang fo mai. Hei hian quality education kan neih tawk loh zia a tilang nia hriat a ni. Zirchianna hrang hrang neih anih hnuah exam-a zawhna siam dan hian pawimawhna thuk tak neiin, zirlaite leh zirtirtuah nghawng nasa tak a nei ani tih hmuhchhuah a ni a. Hei vang hian Board pawhin kum 2020 HSLC leh HSSLC exam atanga hman turin exam dan kalphung leh zawhna zawh dan thar a duang a. Hemi zulzui hian kumin atangin zirtirna pawh kalpui mek a ni. A tum ber chu content-based question atanga competency based question tam zawk zirlai naupangte tana chhawp chhuah niin, hei hian an ngaihtuahna hman thiam zawngah te, an hma lam hun atan leh school a zirna kalpui danah ta zawka nghawng a neih ngei beisei a ni.

He training ah hian MBSE siam kum 2020 Board Exam atanga hman tan tur Scheme or Examinations and Question Design bakah Integrated Evaluation Scheme (IES) software update thar leh software manual chungchang inhrilhhriatna neih nghal a ni a. Training hi district zawng zawngah buatsaih tawh niin Serchhip district hi a tawp kharna atana hman a ni.

He hun hi Pu Lawmawma, DEO, Serchhip chuan a kaihruai a, Pu Michael Lalrinmawia, Academic Officer leh Pu Ricky F. Lalremruatpuia, Regional Officer, MBSE ten zirtirna an pe a. Serchhip District chhunga High School leh Higher Secondary School zirtirtute an tel tha hle a ni.