Revenue Minister Pu R.Romawia Lunglei-a cham mek chuan vawiin khan a department chan hrang hrang - Arts & Culture, Land & Revenue Settlement leh Mizoram Polytechnic, Lunglei - office-te tlawhin hmalakna tur kawng hrang hrang a sawipui a ni.

Minister Pu R.Romawia chuan a hmasa berin Arts & Culture hnuaia Multi-purpose Cultural Complex, Sazaikawn; District Arts & Culture office, District Museum leh District Library te a tlawh a. Hemi hnua Settlement Office (Land & Revenue) a tlawhnaah ama lawmna inkhawm tawite Settlement Officer, Lunglei Pu K.Laltlawmlova kaihhruaiah Pu R.Romawia chuan thusawiin Land & Revenue Department chu department pawimawh tak si, hnathawh harsa tak a ni a; mihring an lo pung a, ram erawh a pung si lova, kan ro dik tak chu leilung nena inzawm laksawn theih lo kan inhmun leh ramte hi a ni a, chumi enkawltu chu Revenue dept. hi a ni, a ti. Surveyor-te ram teh fuh tawk thin loh avangin inthenawmte an inhmuhthiam loh phah thin a, chuvangin department hnathawkte chu mimal duhsakna aiin dikna ngai pawimawh theuh tura a duh thu a sawi a ni. Ram hi Lalpa ta a ni a, a enkawltu chu Revenue Department a ni thung a; ram hi diklo taka sum hailuh nan hmang lovin Department hmasawn nan leh hmingthat nan hmang theuh turin a chah bawk a ni. Lunglei District-ah harsatna leh buaina nei lova, infinchhuah zela tha taka thawk zel turin a fuih a, S.O.-in an mamawh leh harsatna Minister hnena a thlente chu a theih anga hmalakpui a tum thu a hrilh.

Higher & Technical Education Minister a nihna angin vawiin vek khan Pu R.Romawia hian Mizoram Polytechnic, Hrangchalkawn-a mi tlawhin Polytechnic Principal Er.B.Lalhmuakluaia leh Staff ten an lo hmuak a ni. An inkawmhonaah Pu R.Romawia chuan Minister-te luhaina ber chu sorkar hnathawkte Aizawl-a awm vek an duh a ni a, Polytechnic staff-te erawh chu tlawmngaia an hnathawhna hmuhna rinawm taka an thawk zel thei chu a lawmawm tak zet a ni, a ti. Mizoram Polytechnic chhuakte hi sorkarin a hmang tangkai em em a, zirtirtute pawhin ‘missionary’ rilru pua zirna tha pe a chhawrtlaka chherchhuak zel turin a chah a ni. Polytechnic atanga zirchhuakte hi Mizoram-ah chauh hna zawng lovin state pawn company-ah te thawk peih turin a fuih a ni. Polytechnic-ah hian Diploma Course 4 - Civil, Mechanic, Electronic leh Computer Science - te zirtheihin a awm a, hei bakah hian Skill Development lam, eizawnna nghelnghet neih theih nan training pek reng a ni bawk.

Vawiina office hrang hrang a tlawhnaah Revenue Minister hi Higher & Technical Education, Arts & Culture, Land Revenue Department official-te bakah LDCC hruaitu engemawzat ten an tawiawm a ni.