Amah lo hmuaktu mipuite hmaah thu sawiin Minister chuan mipuiten Pathian hnena kan dil sawrkar tha chu min pe ta a, kan Chief Minister berin kan VIP turte chu mirethei, chhumchhia, hmeithai leh riangvaite an ni, a tih avangin heng mite hi kan sawrkar ah chuan ngaihtuah hmasak turte an ni, a ti a. Mizoram mipui ten malsawmna kan dawn theih nan rilru hmunkhat pu turin mipuite chu a sawm a ni. Tuipang khua Tui lama an harsat thu sawi langin Tuipanglui chu Pump hmanga Tuipang mipuite chawm tura ruahmanna siam a nih tur thu a sawi bawk. A sawi zelna ah Minister chuan Chief Minister zahawm tak  Pu Lal Thanhawla’n chhim lam mite min duhsak em em a, chhim lam atanga thlan tlin hote pawh kut ruakin pakhat mah min siam lo a ni tiin heng te hi kan tan malsawmna ropui tak a ni, a ti bawk. Hmasawnna hna kan thawh turah inthliarna a awm lovanga, Pathian duh danin hna rinawm takin kan thawk tur a ni, tiin heng hna thawk tur hian mipuite leh sawrkar hnathawkte tawiawmna kan mamawh a ni, a ti bawk.

Minister tawiawmtu Pu H.Zothangliana, Parliamentary Secretary chu Tuipang atangin Serkawr lamah kalin Serkawr khua a Missionary Compound-a Tourist Lodge sakna tur hmun te leh Tui lama harsatna an tawhte a hmunah a enfiah nghal a ni.

Minister hi Department hotute, Party lam hruaitute leh Chanchinbumi thahnem takin an tawiawm a ni.