Land Revenue & Settlement etc. Minister Pu J.H. Rothuama chuan January 13 - 17 chhung khan a bial, Champhai South Constituency chhunga khua leh veng hrang hrangte fangkualin bial mipuite hnenah lawmthu a sawi.

 

Hmun hrang hrang a tlawhna ah Minister chuan thu sawiin sorkar tharin a tum ber chu retheite khaichhuaha an tana jubilee dar vuak a ni, a ti a. Sorkar tharah chuan miretheite chu VIP an ni, tiin mipui sorkar anih ang ngeia party inthliarna awm lovin sorkar chuan mirethei zawng zawngten khaweng an hmuh theihna tur leh an dinhmun chawikang turin hmalak a tum a ni, a ti a. Sorkar hmalakna a hlawhtlin theih nan mipuite chu dikna, rinawmna leh taimakna vawng nung a tha taka sorkar tawiawm turin a ngen nghal bawk a ni.

January 16 khan Minister hian Champhaia Sorkar office hrang hrang hotute chu CHANEM buildinga I & PR Conference Hall-ah kawmin sorkar hmalakna tur leh ngaihpawimawh tur tlangpuite a hrilh a. He inkhawm hi Champhai D.C. Pu T.V. Fambawl chuan a kaihruai a, Champhai khawchhunga department hrang hrang aiawh officer te an tel tha hle a ni. Officer te hian harsatna an neih hrang hrangte leh an department dinhmun tlangpuite Minister hi an lo hrilh a. Minister leh amah tawiawm tute hian January 17 khan Aizawl an lo thleng leh a ni.