Nimin chawhma dar 11:00 leh chawhnu dar 4:00 khan Pu S.Hiato ,Minister i/c PHE,Tourism etc, chuan S.Vanlaiphaiah leh Darzo khuaah Tourist Lodge Cheng nuai 93.31 ve ve senga Kum 2008,April thlaa sak tan, kum 2010, March thlaa sak zawh tawh te chu a hawng a. Ni 28 August, 2013 ah pawh Bualpui ‘Ng’ leh Sangau khuaah te Tourist Lodge cheng nuai 67.84 leh Cheng nuai 38.77 senga sak te a lo hawng tawh a ni.Heng Tourist Lodge-te hi PWD Building Division, Lunglei ten an sa a, rokhawlhna eng emaw avangin Tourism Department te nen an inhlan fel thei lawk lo a ni. Heng Tourist Lodge hawnna inkhawm tawi hi Pu Vabeiha Hlychho, Director, Tourism chuan a kaihruaia, Minister Pu S.Hiato chu khuallian niin, Pu H.Zothangliana, Parliamentary Secretary chu khualzahawm a ni.

Er.Maipa, EE PWD, Building Division, Lunglei in Technical report a pek zawha thusawiin, Minister Pu S.Hiato chuan Mizorama a ‘Ber’ pahnih Phawngpui Tlang leh Palak Dil te hian Mizoram chhimlamah khualzin mi tamtak a hip khawm mek a, Kolodyne Multi Model Transit Transport Project zawh a nih hunah phei chuan nasa takin ram pawn leh ramchhunga atangin khualzin mi kan dawng dawn. Ngawi kan dawha sangha kan man ang hian, Chung khualzin te abo abang awm lo va man turin, Tourism Department chuan Mizoram chhunga khawlian deuh chin-ah leh khualzin miten an tlawh rin deuh thingtlang khuaah te chuan Tourist Lodge 39 hmangin ‘Ngawi’an dawh mek tawh a, an la dawh belh zel dawn a ni, a ti.Tourism a Mizoram tih hlawhtling tur chuan mipui ten hawihawmna leh rinawmna kan neih hmasak a ngai a, sawrkar nen tang duna khualzin mite hip tura kan inpho chhuah thiam a tul tak zet tawh a ni. Sikkim ho pawh tourism-a an hlawhtlinna thuruk nia lang chu an hawihawmna leh zin mi te hip tura an inpho chhuah thiamna hi a ni, a ti.

Parliamentary Secretary Pu H.Zothangliana pawhin thusawiin, Mizoram pawh Tourism-ah nasa takin tan kan la a, MTDB (Mizoram Tourism Development Board) pawh Chief Minister Chairman-na hnuaiah din a ni a. Tourism lama Mizoram tih hmasawn hi ‘thalaite khawvel thar siamsak’ tih kan sawrkar policy pawimawh tak nen pawh thuangkhata kal an ni a. Adventure sports hrang hranga tui tur leh thiam tura kan thalaite kawng kan sialsak chuan nakin lawka khualzin mi te hiptu hmanrua tha tak a la ni dawn a ni. India ram hmun hrang hrang atang leh ram pawn lam atang te pawhin Trekking, Sky diving, Mountaineering, Rafting etc. tih tur ringawt pawhin khualzin mi tam tak hian nakin lawkah chuan Mizoram hi an lo la zin nasa dawn a ni.chutiang mi te tan hlei hlei chuan hmun tam taka Tourist Logde ka lo neih te hi an tangkai hle dawn a ni,a ti bawk.

Heng Tourist Lodge hawnna inkhawmah hian Minister hi Pu H.Zothangliana, Parliamentary Secretary, Pu Ngunlianchunga, LADC, CEM leh a thawhpui EM leh MDC thahnem tak, MADC-a EM leh MDC thahnem tak, Er.R.Lalfanliana, PHE E-in-C leh athawhpui Officer-te, Tourism Director Pu Vabeiha Hlychho leh athawhpui officer-te, Er.Maipa EE, PWD Building Division, Lunglei leh athawhpui officer-te, Saiha a Head of Office thahnem takin an tawiawm a ni.