Nimin tlai dar 4:00 khan Pu S.Hiato, Minister i/c PHE,Industries etc. chuan Sangau Water Supply Scheme(Pumping) phase-I hawng. Sangau WSS phase-I hawnna inkhawmah hian thusawiin Minister chuan tun sawrkar kum 5 chhung hian PHE Department hi hnathawk nasa ber te zinga ami Department a ni, a ti. Minister chuan tui harsatna khuaah chuan ‘inkhua in eng nge a mamawh ber’? tih ila, Rinna lam hawi zawnga ngaituah lem lo chuan ‘Tui’ an tih ngei ka ring a ni, a ti.Nunna atan boruak thianghlim a pawimawh tluk zeta pawimawh a nih avangin sawrkar pawh hian Mizoram khawtina tui thianghlim hnianghnar taka pek hi mutmawh hnarmawhah neiin a thawk nasa hle a ni. Mizorama khua 777 awm zingah khua 7-ah tih chauh lo chuan PHE department hian tuilakna siam vek tawhin, a tihchangtlun hna pawh a thawh chhunzawm mek zel a ni, ti bawk.

Sangau WSS phase-I hawnna inkhawmah hian Pu H.Zothangliana, Parliamentary Secretary leh Sangau bialtu ni bawk chuan PHE department hnuaia NEC (North Eastern Council) Scheme hmasa ber hmanga a bial chhung mipuiten tui hnianghnar taka hman tur an han neih mai tur hi Pathian leh Chief Minister Lal Thanhawla malsawmna a ni, a ti.

Sangau WSS phase-I hawnna inkhawmah hian Ngunlianchunga, LADC, CEM leh PHE, E-in-C Er.R.Lalfanliana te pawhin thusawina hun an hmang. Er.H.Lallianmawia,E.E. PHED,Saiha Watsan Div. chuan technical report pein, Technical Report-a a lan dan chuan Sangau WSS phase-I hi cheng vaibelchhe 4.84 senga siam a ni a. PHE department hnuaia NEC (North Eastern Council) Scheme hmasa ber a ni a, tahrik 18.1.2010-a sanctioned a ni. He Sangau WSS Phase-I hian nikhatah mi pakhat tan tui 40litre zel hisapin kum 40 chhung sangau khua mipuite chawm zo tura ngaih a ni. Tui hi Mizoram tlangsang ber Phawngpui tlang atanga rawn luang chhuak Cheu Lui leh Vanhlira Tui atang te a lak a ni a, tui lakna thui zawng hi 15.85Km a ni.Tui tihthianghlimna leh Pump house hi Sangau khaw hnuaia dah niin,Sangau khawchhungah Tuizem litre 1,50,000 dawng siam a ni bawk.

Sangau WSS Phase-II hna pawh thawh tan tawh niin, cheng vaibelchhe 4.716 hmanga thawh tur a ni. Sangau WSS phase-II hian Sangau khawpui chhung bakah Pangkhua leh Thaltlang te pawh a huam tel dawn a ni.  

Sangau WSS Phase-I hawnna inkhawmah hian Minister hi Pu H.Zothangliana, Parliamentary Secretary, Pu Ngunlianchunga, LADC, CEM leh athawhpui EM leh MDC thahnem tak, MADC-a EM leh MDC thahnem tak, Er.R.Lalfanliana, PHE E-in-C leh athawhpui Officer-te, Tourism Director Pu Vabeiha Hlychho leh athawhpui officer-te, Er.Maipa EE, PWD Building Division, Lunglei leh athawhpui officer-te, Saiha a head of Office thahnem takin an tawiawm a ni.