1407/2023-2024

Champhai the 7th August,2023 - Vawiin chawhnu khan Urban Primary Health Centre (UPHC) Champhai Vengthar ah Minister Pu TJ Lalnuntluanga hovin H&FW Department thawktute, tlawmngai pawl hrang hrang aiawhte leh khawtlang hruaituten inkawmhona hun an hmang a ni.

He hunah hian Minister leh Champhai South AC bialtu MLA ni bawk Pu TJ Lalnuntluanga  chuan UPHC, Champhai Vengthar ram, School Education Department ta ni thin chu Council of Ministers Meeting dated 31/07/2023 chuan H&FW Department ah hlan a rem tih thu a sawi a. UPHC Vengthar ram H&FW Department kuta a awm ta chu hmasawnna pawimawh tak a ni tiin, an mamawh khawl leh ruhrel te pawh ruahman belh zel tum niin Corporate Social Responsibility (CSR) kaltlanga hmalak dan te ngaihven mek a nih thu a sawi a. UPHC Vengthar chu Champhai khawpui leh a chhehvel khuaa cheng mipuite tana hriselna ruhrel pawimawh tak anih thu sawiin thawktu doctor, nurse leh midangte inpekna leh thawhrimna avangin an chungah lawmthu a sawi a, Vengthar khawtlang hruaitu leh tlawmngai pawlte pawh khawtlang hmasawn zelna turin hmalak pui zelah a sawm a ni.

Champhai CMO Dr PC Lalhmingliana pawhin thu sawiin UPHC Vengthar ram H&FW Department kuta a awm theihna tura theihtawp chhuahtu Minister Pu TJ Lalnuntluanga leh Vengthar khawtlang hruaitu leh tlawmngai pawlte chungah lawmthu a sawi a. National Urban Health Mission (NUHM) hnuaiah Programme Implementation Plan (PIP) siam chhoh leh mek anih thu sawiin UPHC Vengthar ram leh hmunhma Department kuta a awm ta chuan hmalak zel pawh a ti awlsamin ruhrel leh khawl bun belh chungchangah pawh nghawng tha tak ala nei zel dawn a ni, a ti a.Mipuite damna leh hriselna tura H&FW Department hmalakna hrang hrangah khawtlang hruaitu leh tlawmngai pawlte tawiawmna leh finchhuahna a pawimawh takzet thin a ni tiin kawng engkima hmalak pui zelah a sawm nghal bawk a ni.