1406/2023-2024

Dated Aizawl, the 7th August, 2023: Vawiin khan Zoram Medical College chuan Academic Building tharah an Founding Day vawi ngana an lawm a, he huna khuallian Pu Zoramthanga, Chief Minister chuan ZMC Academic Building thar hi a hawng a, Dr. R. Lalthangliana, Health Minister chu khualzahawm a ni.

Chief Minister hian zirlai tithate hnena lawmman a sem hnuah thu sawiin, ZMC rawn pian dan hi a kawng a bumboh khawp mai, a tirah Central atangin Crore 40 kan dawng a, Referral Hospital sak kan rel a, central sawrkar atangin a umzuina tur pawh beisei tur a awm chuang lo. A hmun tur ngaihtuahin kan inrawn khawm a, hun rei zawka la thanglian zel tur anih hre chungin Falkawn kha kan thlang ta a ni. Kan sum neih khan damdawiin building leh quarters a daih chin chin kan sa ta a ni. Referral Hospital chu a taka kalpui turin sum kan nei zui ta si lova ni. Hun rei tak a khaihlak ta a nih kha. A hnuah MIMER tiin chhunzawm a lo ni leh ta a, kan hriat angin kum nga kalta vawiin ni angah khan a lo ding tan tak tak ta a nih kha. A hming erawh kha chu mi nawlpui tana han lam awlsam zawk turin rawtna tam tak zingah ZMC tih kan thlang ta a ni, tiin a bul tan dan tlangpui a tarlang a. Hmathlir fel tak neia hmasawnna hna hi kalpui a ngai a, a tira hmathlir thui tak nei chunga Falkawna kan lo dah hi a fuh em em a ni. Chutiang bawkin hmathlir fel tak neiin MINECO te pawh din a ni a, chutiang zelin thil dang dangah pawh hmathlir fel tak zarah hmasawnna duhawm tak tak hi kan hmu zel dawn a ni, a ti. Covid hripui vang khan Central sawrkar atanga hmasawnna hna kan thawh vena tur sum lo kal tura beisei lokal thei ta lo kha a tam em em mai a. Chu phurrit phur chung chuan kan mamawh em em ZMC in hma a sawn theih nan sum kan ngaihtuah sak hram hram thin a ni, tiin tun hnaia ZMC in a mamawhte a hmuh theih nana sum leh pai sawrkarin a ngaihtuahsak hram hramzia a tarlang bawk. Tlukchhiatnain Japan a nuai lai te, Germany a nuai laite khan an ram mipuite leh hruaitute kha beidawng awm tak an ni, mahse vawiinah chuan heng ram pahnihte hi khawvela ram ropui an lo ni leh ta. Keini pawhin chu rilru chu puin vawiina harsatna hrang hrang lo thlengte hi kan hneh anga, sang zawkah kan ding chhuak leh ngei ang tih ka ring tlat a, hun harsate hian an daihrei ngai lo, mi tumruhte zawk hi an dingchang thin a ni. Leilung leh a chhunga awm zawng zawng neitu Pathian hian hun hnuhnunga a chanchintha hriltu atan min din mek a, min kalsan ngai lovang tih hi ka ring tlat a ni, a ti.

Khualzahawm Dr. R. Lalthangliana pawhin thu sawiin, he ni hi kan tan ni bik a ni. Academic Block thar tha tak Covid19 harsatna karah kum li chhungin kan sa zova, he building hi a mal maia Health Department building man tam ber a ni. Recognition Inspection neih lai laiin ZMC hi covid dedicated hospital atan kan puang a, chuti chung chuan recognition hi National Medical Commission hian min pe ta thova, a lawmawmin a hlu em em a ni, a ti. Kan ramah Doctor indaihlohna a nasa a, nimahsela ZMC zarah reiloteah Mizoram hian doctor kan indaih thuai dawn a ni. Amaherawh chu MBBS china kan lungawi mai a thiang lova, sang zawka kal zela he College ngeiin zirna sang zawk a kalpui huna faculty tha tak tak rawn ni thei tura kan beih a ngai a ni, tiin zirlaite leh thawktute a chah a ni.

5th Founding Day lawmna leh Academic Building thar hawnna inkhawm hi Pi Esther Lal Ruatkimi, IRS, Principal Secretary, Health & Family Welfare chuan a kaihruai a, Rev. Vanlalnghaka Ralte in hunserh hmangin Dr. Jane R. Ralte, Registrar, ZMC chuan report tlangpui a pe a ni.

Academic Building thar hi Ministry of Health & Family Welfare, Govt. Of India sum Rs. 60 crore senga sak niin 2018 khan a sak hna bul tan a ni a, nikum laihawl khan sak zawh a ni. A building hi chhawng ruka sang niin Department hrang hrang pariat, Lecture Hall pali leh Exam Hall te bakah Laboratory te dah an ni. Building pumpui zau zawng hi Sqm 13,500 a zau niin, consultant hi HSCC (India) Ltd., an ni a, a satu contractor hi M/s MP Khaitan an ni.

Vawiin hi College hawn anih atanga a kum ngana a ni a, thawktu zawng zawng hi 723 awm mekin tunah hian MBBS zirlai batch 5 an awm a, zirlai zawng zawng hi 489 an ni mek a ni. Batch tinah hian Seat 100 awmin chung zinga 70 chu Mizoram State quota a ni a, a dang 15 chu All India Quota niin a dang 15 hi Non Resident India quota a ni. Batch hmasa ber ten kuminah final exam an nei tawh a, zirlai 95 an pass a tunah hian Internship an ti mek a, anni bakah hian Foreign Medical Graduate 6 ten internship hi an ti ve mek bawk a ni. ZMC Hospital hian unit 19 ah khum 470 a nei mek a, Casualty ah khum 20 awmin, ICU ah khum 17 a nei mek bawk, ICU khum 30 dang pawh hawn belh thuai tum a ni. Operation Theatre hi Major OT 10 leh Minor OT 6 a awm mek a, Zirlai 200 lenna Library, mi 220 awm theihna Boys Hostel leh zirlai 260 awm theihna Girls Hostel te, thawktute Quarters 225 te bakah khawl tunlai ber ber hmanga thuam a ni a, research project pawh peng hrang hrang 14 an kalpui mek a ni.

He hunah hian Dr. ZR Thiamsanga, MLA, Vice Chairman, Health & Family Welfare Board pawhin thusawina a nei a,  Prof. F. Lalnunmawia bialtu MLA leh official pawimawhte bakah ZMC thawktute leh zirlaite an tel a, inkhawm hi Dr. John Zohmingthanga, Director, ZMC in lawmthu sawiin a khar a ni.