1924/2023-2024

Champhai the 18th September, 2023 – Champhai District chhunga High School leh Higher Secondary School zirlaite an hmalam hun kawhhmuhna leh hna hrang hrang chungchang inzirtirna hunpui ‘Career Mela’ chu vawiin khan Champhai Venglai Community Hall-ah Hon’ble Minister Law & Judicial, Transport etc Pu TJ Lalnuntluanga chuan a khuh hawng a. Hemi puala buatsaih lehkhabu ‘Career Mela 2023 Resource Booklet’ a tlangzarh nghal bawk a ni.

He Career Mela hi May 2023-a Champhai District Development Coordination and Monitoring Committee (DISHA) thutkhawmna atanga rawt chhuah niin Champhai District Education Committee (DEC) hmalakna a ni a. Vawiin Kick-Off Program-ah hian Champhai DEC member-te, official-te, zirtirtute leh zirlai thahnem tak leh sawm bik dangte an tel a. Career Mela hi District chhung hmun hrang hrangah neih chhunzawm chhoh a ni dawn a ni.

Hawnna inkhawm Pu C.Lalbiakzauva, DEO & DPC Samagra Shiksha kaihhruaiah Minister Pu TJ Lalnuntluanga chuan ‘Career Mela’ chu zirlaite kawng kawhhmuhtu leh hna hrang hrang chelh chho tura an inpuahchahna kawngah hmanraw pawimawh tak anih ngei a beisei thu a sawi a. Tunlai khawvel changkang chho zelah Mizoramah pawh job opportunity thar tha tak tak a awm tawh thu sawiin zirlaite chu officer hna leh hna lian danga kan ngaihte mai piah lamah mahni tui zawng leh thiam zawng lam ngaihtuaha rilru nei taka ke pen turin a chah a. Mizote chu tawngah kan chakloh thin avangin kan nih tur te kan thlen phak loh fo thin thu sawiin Minister chuan zirlaite chu English, Hindi leh tawng dangte pawh zir nachang hre turin a chah a. Career Mela chu Champhai District zirna tih hmasawnna kawnga bultanna chauh anih thu sawiin Planning & Programme Implementation Department te nen tangkawpa zau zawka hmalak chhoh tum mek anih thu a sawi a. ‘Career Mela 2023 Resource Booklet’ a resource persons te chungah lawmthu sawiin, zirlaite chu tangkai taka lo hmang ngei turin a ngen in a chah a ni.

He huna khualzahawm Champhai DC & Chairman District Education Committee Pu James Lalrinchhana pawhin thu sawiin, Career Mela chu Champhai District tana hmasawnna rahbi thar pawimawh tak leh kan khawtlanga nghawng tha tak nei zel tur a ni tiin a buatsaihtute leh resource persons te chungah lawmthu a sawi a. Zirna lamah Champhai District tan rualawhna tur a tam hle tin a ni tiin, District chhunga zirna in hma a sawn zel theihnan District Education Committee Chairman chuan zirtirtute leh zirlaite theihtawp chhuaha, an zirlai mai piah lamah an eizawnna kawng zawh tur lo inzir turin a chah a. Zirlaite chu technology leh internet te hmang tangkai a, kawng hrang hranga hmasawn tum tur leh hmathlir thui tak nei chunga ke pen turin a chah a ni.

Chawhnu lamah Pu Rosangliana, DLEO Champhai chuan Job Oriented Career chungchang lecture a pe a ni.

‘Career Mela 2023 Resource Booklet’ a article awm te chu:

1. Common University Entrance Test (CUET) – Dr Ellie Lallianpuii, Assistant Professor, Government Champhai College.

2. New System of Higher Education as per NEP, 2020 - Dr Ellie Lallianpuii, Assistant Professor, Government Champhai College.

3. Academic Career – Pu H.T. Malsawmtluanga, Assistant Professor, IASE, Aizawl.

4. Job Oriented Career – Skill Acquisition – Pu Rosangliana, DLEO Champhai.

5. Competitive Career (Mizoram Civil Service) – C. Lalremruati, DIPRO Champhai.

6. NEET & SMATEE – Lawmsangzuali Renthlei 3rd Year, MBBS

7. Joint Entrance Examination (Main) – Pu V. Laldanmawia, EE (Planning), PHE.

8.     Career Guidance for Science Subjects – Dr Jehovah Ringzuala Pachuau, Consultant Laparoscopic & General Surgeon.