2226/2023-2024

Champhai the 9th October, 2023 - Govt Champhai College-in Week an hman chu vawiin khan Transport Minister, Champhai South bialtu MLA ni bawk Pu TJ Lalnuntluanga'n a hawng.

Week hawnna Champhai Zotlang Sports Stadium-a hmanah hian khuallian Pu TJ Lalnuntluanga chuan zirlaite chu College an kal hunlai chu nakina an hma lam hun hriltu tura hun pawimawh ber a nih avangin an nun uluk taka hmang turin a chah a, tun lai khawvel chu thalaite khawvel a nih tawh avangin thalaite suk thlek chuan ram kalphungah nghawng pawimawh tak a neih avangin rilru hrisel leh thianghlim an neih a pawimawh hle a ni a ti a. Minister chuan Zirlaite chu nakina la in mamawh tawn vek tur a nih avangin zirlai an nih lai atangin lehkhazir kawngah a ni emaw thil hrang hrangah a ni emaw inpuitawn theuh turin a chah a, zirlai leh zirtirtute thawhhona thain College environment tha a siam thin avangin tha taka thawkho zel turin a chah bawk.

Govt Champhai College Week hawnna inkhawm Lawmsangzela, SU General Secretary kaihhruaiah hian Pu P Lalhmingliana Govt Champhai College pawhin thu sawiin zirna chu lehkha zir ngawr ngawr ni lo, kawng engkima hmasawnna a nih avangin College-in week an hman tur chu taksa bakah rilru hrisel leh thianghlim an neih theihna tura tangkai tak leh hlim taka hmang turin duhsakna a hlan a ni.

Govt Champhai College-ah hian zirlai 740 an awm mek a; Week hian October ni 16 thleng a awh dawn a ni.