2462/2026-2027 

Aizawl, dated 1st October 2026: Public Works Department (PWD) Minister Pu Vanlalhlana chu vawiin khan Irrigation & Water Resources Department Auditorium, MINECO-a Mizoram Engineering Service Association (MESA) Annual General Conference vawi 45-naah chuan khuallian niin hun a hmanpui.

Minister Pu Vanlalhlana chuan thu sawiin he huna a tel thei hi a lawm hle a ni tih a sawi a, MES officer te chu an hnathawh hian kawlphetha te, tui te, kawng te leh in sak te a huam kim em avangin mipui tan an pawimawhin khawtlang leh ram tan an hlu em em a ni tih a sawi a. Kum 40 chuang an pawl a ding thei ringawt pawh hi thil ropui tak a ni tih a sawi a, tuna Mizoram changkanna leh hmasawnna tam tak hi an hnathawh rah a ni tiin an fakawm a tih thu a sawi. Engineer an nihna angin an hnathawhnaah creativity leh innovation neiin, thil thar siam chhuah tum zel turin a fuih a, mipui tana hnathawk an ni tih hre rengin chu rilru chuan an nitin hnathawh kaihruai zel se a tih a thu a sawi bawk a ni.

He hun hi MESA President Er. Lalrinzuala Ralte chuan chairman niin a kaihruai a, MESA General Secretary Er. PC David Lalrinliana chuan MESA chungchang leh an hnathawh leh thiltih te sawiin report a pe a. Sr. Adviser Er. Zodinthari leh pensioner aiawhin Ex-President Er. H. Zoramliana te chuan thu an sawi a, Pi K. Lalthlamuankimi hnen atangin zai ngaihthlak a ni bawk. Pensioner thlahna leh member boral sunna hun hman a ni bawk a, Jt. Secretary Er. K. Lalsangzuala'n lawmthu sawiin zing hun a khar a ni. Zing programme zawh hian chawhnuah business session hman a ni a, Vice President Er. Lalrinmawia'n a kaihruai a ni.

Mizoram Engineering Service Association (MESA) hi kum 1972 khan din an ni a, an thupui chu "Service to the People" (mipui tana rawngbawl) tih niin tunah hian member 362 an awm mek a ni. MESA hnuaiah Mizoram Engineering Service (MES) officer te an awm a, Public Works Department, Public Health Engineering Department, Power & Electricity Department leh Irrigation & Water Resources Department te a huam a ni.