2463/2026-2027 

Nimin khan School Education Minister Dr. Vanlalthlana chuan School  Education Directorate Conference Hall-ah chawchhun chhumtute training-na tur Portal (Cook-cum-Helpers training Portal) chu Mizoram Sawrkar hnuaia PM POSHAN (Mid-Day Meal) semna Primary leh Middle School-a chaw chhumtute  leh Zirtirtuten tangkai taka an hman atan a tlangzarh. 

Minister chuan he hunah hian thusawiin chawchhun buatsaih chungchangah hma an sawn zel thu te, naupangten ei tur tha an neih theih nan Department hotuten Central-a an buaipui dan chu lawmawm a tih thu a sawi a. Chaw chhumtute hlawh pawh tihpun a nih thu te, Central-in cook pakhat tan Rs 900 a rawn pek chu state sorkarin Rs 600-a a lo do let thin chu, tun hnaiah state sorkarin a do letna hi Rs 600 atangin Rs 2100 ah tihsan a nih thu leh Central sorkar pek nen Rs 3000/- an hlawh tak thu a sawi. Chaw chhun siamna atana central-in pawisa a rawn pek chu KG atanga Class V thleng hian naupang pakhatah Rs 6.11 a nih thu te,  Class VI atanga Class VIII thlengin Rs 7.35 an rawn pek thu te leh state-in Re 1-a a lo do let thu a sawi a. Chaw chhumtute tana training portal hawn a ni ta chu lawmawm a tih thu leh hmasawn zel thei tura tan lak zel a pawimawh thu a sawi bawk.

He Portal hi chaw chhumtuten naupangte tana ei tur thianghlim leh hrisel, an taksa mamawh ang mil zela chaw leh chawhmeh an siam a, ei leh in thianghlim lo leh hrisel lo laka naupangten an tawrh lohna tura in zirtirna tur a ni. He training Portal-ah hian, PM POSHAN scheme hnuaia chaw chhumtu zawng zawngte chu an in register ang a, training video kim chang takin an en thei dawn a. Chubakah, training video an en zawh apiangin, portal chhungah hian an thiam leh thiam loh enfiah nan, test paltlang zel tur a ni dawn a.  Heng test an paltlang hnu hian, chaw chhumtute chuan completion certificate an dawng dawn a ni.

He portal hawnna hi School Education Department Director Pi Angela Zothanpuiin a kaihruai a, School Education Officer te, Kohhran hruaitute leh  tlawmngai pawl hruaitute an tel a ni.