Minor Irrigation Department-a Technical Officers leh Staff tana ni 3 chhung awh Training neih tak kharna inkhawm chu vawiin khan Agriculture Conference Hall-ah hman a ni a. Parliamentary Secretary to Chief Minister Pu Lal Thanzara’n training kharna hun hi a hmanpui a ni.

Training kharna inkhawm Er. Laldingliana, SE (Works & Designs) kaihhruaiah Parliamentary Secretary Pu Lal Thanzara chuan Minor Irrigation Department hi kum 1974-75 vela leilet tui kawng siam nana mamawh sum 50% subsidy-a sema bul tan niin kum 1983-84-ah Agriculture Department hnuaia seng luh a ni a, kum 1985 atang khan Plan hran leh Budget hrang neia hma la tan chauh, department naupangte nimahse, vawiinah chuan Zoram hmun hrang hranga kut hnathawktute, a bikin leilet siam leh sangha dil siamte tana an hmalakna a chhuanawm hle a ni, a ti. Ram hmel tidanglam tur leh ei leh barah intodelhna thlen theih nan Minor Irrigation Department hmalakna a pawimawh tak zet a, chuvangin rinawm leh taima takin i thawk zel ang u, a ti. Leilet tih tham sawi tur awm lohna - Kolasib Tuichhuahen Zau, Saihapui, Lumtui Zawlpui, Champhai Tiau luidung, Bulfek leh a chhehvel te chu Minor Irrigation hmalakna avangin tunah chuan leilet tha tak tak hmuh tur a tam tawh hle bakah Kolasib leh a chhehvel ringawtah pawh Minor Irrigation hmalakna zarah Sangha dil 200 chuang a awm tawh chu a lawmawm hle a ni, a ti bawk. Ram thang zelah ei leh bara intodelh nan lonei dan changkang leh tunlai zawk - approach road tha, terrace siam, leileh, lei rihzawl - te hi Department field engineer te kutah a awm vek avangin ei leh bar intodelhna tur 70% hi an kutah awm a ni tih hriain thahnemngai taka thawk turin a ngen a, Contractor-te hna a dawrawm loh nan vil taima turin a chah bawk a ni. Mizo mipuite tan malsawmna nasa zawk thlen tur chuan ‘kan mihringpuite rawng kan bawl sak hian Pathian rawngbawl tluk kan ni’ tih i hre reng ang u tiin Pu Lal Thanzara chuan vawiina training zo zawng zawng officer leh technical staff te an hnathawh zelnaah duhsakna a hlan a ni.

Minor Irrigation Chief Engineer Er. Lalthanliana pawhin Department hmasawnna leh hmachhawp hrang hrang tarlangin kum kalta chhungin Department-ah post 20 hnawhkhah thar a nih thu te, a nghet lova thawk MR 6 chu dahngheh an nih thu leh an Department hnathawk 22 lai an kaisan thu a sawi a. Department-in hmasawnna hmel thar a hmuh ang zelin a hnathawkte pawhin nasa zawka tanlak leh taimak chhuah chu kan bat a ni tiin training zo te a fuih bawk.

Vawiin training kharna hun hi hun hnihah then niin chawhnu lamah chuan Minor Irrigation hnuaia Project kalpui mek hrang hrang leh Project thar siam tul hrang hrang te sawihona an nei nghal a ni.