Mizoramin kumin inthlanpui felfai taka kalpui anih theihna atana an hmalaknate thuchhuah siamin an tarlang.
Mizoram Police te chuan Mizoram ah thlamuang tak leh thianghlim taka kumin MLA Inthlanpui kan neih theihna tur leh Reang(Bru) Relief Camp-a awm mek ten Mizoram a thlamuang taka vote an thlak theihna turin nasa takin tan an la mek a. A bikin Reang(Bru) te awm tamna District, Mamit, Kolasib leh Lunglei ah te venhimna leh ruahmanna uluk taka kalpui ani.
Heng Reang (Bru)-te chenna leh hruaikirna hmun leh khua te hi Police Officer ten ngun taka vilin an tlawh reng a, an harsatnate leh mamawhte enin an ngaihthlak sak a. Ralmuang tak leh lung muang taka vote an thlak theih nan boruak tha siam zel ani bawk. Tun tum Election atana venhim hna thawk tur leh mipuite thlamuan tura Sipai (force) lokal turte - Central Armed Police Force(CAPF) leh State Armed Police (SAP) te pawh dt. 29.10.2018 atang khan anlo thleng mek zel a. An ni hian venhim ngai lai hmun (vulnerable areas) ni a langah te Patrolling te neiin duty uluk takin an ti zel dawn a ni.
1) Mamit District ah hian tun hnai Bru-repatriation ah khan Bru chhungkaw 11-a member 67 te chu Tripura Relief camps atangin Mamit district chhunga khaw pathum, Sihthiang, Bawrai leh Bungthuam ahte an in bengbel a. Police pawhin security tha taka pe in ngun taka vil reng ani a. Police Officer ten heng khuate hi tlawhin an kan thin a ni. Tin, Bru chenna khaw dangte pawh uluk taka vil niin an harsatnate ngaihthlak sakin thlamuan reng an ni bawk.
Mamit District chhunga khaw pahnih W. Bunghmun leh Tumpanglui ahte ni 28.10.2018 ah khan Border-Outpost (BOP) thar hawn niin 4th IR Bn, Luangpawl ami ten heng BOP te hi an enkawl nghal a. Khaw mipuite leh Bru chhungkua ten thlamuang taka Mizoram a vote an thlak theuh theihnan hma lak mek zel ani.
2) Kolasib District ah pawh tunhnai Bru-Repatriation ah khan chhungkaw 2 a member 10 te lo lutin ni 28.8.2018 ah khan Meidum leh Zodin (Rasdali) khua ah dah an ni a. Police te venhimna leh enkawlna in thlamuang takin an cheng mek ani. Tin, District chhung a Bru chhungkua te chenna hmunte hi Kolasib leh Bairabi Police station atang te in tlawh thin ani a. Heng khua, Zophai, Pangbalkawn, Bukvannei, N.Thinglian, S. Chhimluang, Saihapui K, Dilzau leh Hortoki te hi venhim ngai bik, vulnerable areas an nih avangin Police ten venhimna ah ngaih pawimawh an ni a. Patrolling leh venhimna hrang hrang hmanga vil reng an ni bawk.
Kolasib District chhung a khaw pakhat, Bukvannei khua ah dt. 29.10.2018 khan Border-outpost (BOP) thar hawn ani bawk a, 1st IR Bn, Mualvum ten he BOP hi an enkawl mek ani. Mipui te, Bru chhungkua ten lungmuang taka vote an thlak theihnan Police ten hma lak zel ani.
3) Lunglei District ah pawh tun tum Bru-repatriation hnuhnung berah khan chhungkaw 20-a member 86 lai te chu Tripura Relief Camp atanga lo haw in khaw pahnih, Dinthar leh Putlungasih khua ah te an in bengbel a. Police venhimna leh enkawlna pek niin ngun taka vil leh tlawh reng an ni a. An harsatnate leh mamawh te a theih anga enzui sak zel an ni.
SDPO Tlabung leh Officer-in-charge, Tlabung, Lungsen leh Bunghmun PS ten an mahni area theuha Bru-khua te an tlawh in an vil reng a, thlamuang taka vote anthlak theihna tura hma lak mek zel ani. Tin, tunhnaiah Police Officer (Inspector) chu DEO Lunglei in Officer aruat te nen Tripura a Bru relief Camp-te tlawh a, Bru voters ten lungmuang taka Mizoram a vote an lo thlak theihna turin hma an la ang.
4) Tun tum Mizoram Inthlanpuiah hian Central Armed Police Force (CAPF) leh State Armed Police (SAP) te ni 29.10.2018 atang hian lakluh tan niin a hmasa (first phase) atan Company 15 (mi 1500 bawr) chu District pariat a Duty turin anlo thleng tan a. Chungte chu:-
(i) Assam SAP (AP Bn.& IR Bn.) Company-10: Aizawl District tan company-3, Mamit & Champhai tan Company- 2 ve ve leh Kolasib, Serchhip & Siaha District tan Company khat (1) theuh te.
(ii) 438 Bn. BSF Company-3: Aizawl, Lunglei leh Kolasib District tan Company khat theuh.
(iii) CRPF Company- 2 : Mamit & Lawngtlai District tan Company khat ve ve.
Heng Sipai/Police force te hi Local Police/Mizoram Police te leh Magistrate te nen hna thawk hovin mipui ten thlamuang leh fel fai taka vote kan thlak theihnan te, Election a sum hmanna endik (expenditure monitoring) te, Thil duhawmlo leh thalo dap chhuah hna te an thawk dawn a. Flying Squads, Static Surveillance Teams, Quick Response Teams, Sector Police leh Nakas (Check-posts) ah te hman an ni anga. Tin, venhim ngai bik Critical Polling stations leh Vulnerable areas ah te duty in Patrolling an nei bawk ang. Mipui ten mahni chanvo leh dikna hmanga an duhthlanna ngeia Vote an thlak theih nan a venhimna hna thawk tur leh mipui thlamuantu tur te an ni.
Mizoram Police te chuan Mipui zawng zawngte thlawpna leh tanpuina kan ngen tak meuh a.Kan hnathawhna leh venhimna hna te, thil thalo leh duhawmlo dap chhuaka mipuite veng him turte in kawng hrang hrangin hma kan la mek a, kan la zel dawn a. Dan anga kan hma lakna kawngah te fimkhur taka leh mipuite harsatna siam lo thei ang bera hna thawk turin kan in fuih reng bawk a. Kumin a Inthlanpui kan hmachhawn turah hian Vote nei zawng zawng ten lungmuang tak leh dik taka vote kan thlak theuh theih nan hma i la zel ang u tih hi mipuite kan ngenna leh sawmna ani e.
