Department of I&PR a Mizoram Information Service Association (MISA) member te chuan vawiin khan anmahni Conference Hall-ah Annual Conference 2011 hmang in thu pawimawh hrang hrang engemaw zat an rel a ni. Vawiin a Conference hi an Association President Pu David L. Thangliana’n kaihruaiin kum kalta chhunga an pawl hmalakna tlangpui General Secretary Pi P.B. Lianthangpuii’n a tarlang a ni.

Mizoram sorkar leh a bik takin sorkar mi pawimawh state chhung leh pawn lam mite enkawl thin, an thu leh hla mipuite hnena puanzar saktu leh sorkar leh mipui inkara mawhphurhna pawimawh tak nei Mizoram Information Service Association te hian sorkar nghawng thil engemaw zat an rel a. Chung zingah chuan Officer leh Technician post ruak an neih te hnawhkhah thuai sorkarin phalsak tura an ngenna te ; thawktu indaihlohna phuhruk nan hna siam belh dil rawtna te ; an hnathawhna hmanrua pawimawh ber pakhat lirthei tha zawk leh tam zawk sorkarin ngaihtuah ran sak se an duh thu te a tel a. An pawl chhunga inkaihhruaina leh department chhunga harsatna hrang hrang an neih te chipchiar taka sawiin thuneitu sang zawk a chak lehzuala bawhzui dan tur te pawh vawiina conference ah hian rel tel an ni.

MISA hian nimin khan intuaitharna hun an hmang bawk a. An hna langsar leh pawimawh ber pakhat sorkar thuchhuak siam kawnga fimkhur a tul zia inhrilh thar lehin tunlai khawvel ah media in chak taka hma a sawn mek man pha ve zel tur leh hetiang boruak ah hian sorkar thu leh hla dik leh belhchian dawl mipui hnena hrilh hriat a pawimawh thu te in hrilh nawn leh in tan lakna tur hrang hrang te pawh an duang a ni.