“Zirtirtuten Missionary thinlung pua thawh hi kan ram dinchhuahna tur a ni” Pu Lalchhandama Ralte chuan a ti.

He thu hi tukina Sawleng khua a tlawha mipui lo kalkhawmte hmaah a sawi a. Minister chuan zirtir hna hi Missionary hna a ni a, Pathian rawngbawlnaa ngaia lungsi taka thawk turin zirtirtute chu a sawm a ni. Zirtirtute hi kan tu leh fate hma lam hun siamtu an ni tih sawiin an tih awm leh awm loh te, ei leh in duh zawng thlengin zirtirtu nihphung dik tak anga awm turin a sawm a ni. Minister chuan tun sorkar hun rei loteah hian Education Department-ah hlawhtlinna thahnem tak kan nei tawh a ti a. Hmasawnna dang-kawngpui tha te, electric power te leh tui in tur tha te a pawimawh. Amaherawhchu zirna hi mihring chherna anih tlat avangin hmasawnna kawng hrang hrangzingah a pawimawh ber a ni a ti bawk.

Minister chuan hmar tlangdung tana Higher Secondary School -a Science zirna Darlawna hawn tur chu he tlangdung tan a chhenfakawm hle dawn a, he Science zirna avang hian hmar lam tlang dung mamawh, technical lama mithiam chu a tlangdung mi ngei he school atang hian an chhuak thei dawn a ni a ti.

Minister hian nizan khan Darlawn Community Hall-ah Darlawn leh a chheh vela sorkar hnathawk leh khawtlang hruaitu kalkhawmte hmaah thu a sawi bawk a. Sorkar hnathawk kalkhawmte chu puanven sawichhinga mahni hna theuh thahnemngai taka thawk turin a sawm a, khawtlang hruaitute pawh anmahni veng theuha zirna in leh compound-te humhalh turin a sawm a, zirna hmunte chu zaha humhalh tlat turin a chah a ni.

Minister-in a bial khua a fannaah hian school Education Department hotu thenkhatte leh Sinlung Hills Council a EM ten an tawiawm a ni.