1152/2026-2027

Dated Aizawl, the 24th June 2026: Vawin khan 14th State Level Library seminar & training for government recognised libraries, June 24 leh 25 awh tur hawnna inkhawm chu Chanmari Y.M.A hall-ah neih a ni a, Art & Culture dept. Minister Pu C. Lalsawivunga chuan khuallian niin a hmanpui.

Khuallian chuan thu sawiin, state level library seminar & training-a kalkhawmte chungah lawmthu sawiin, library hmasawnna tura Art & Culture Dept, Mizoram, Raja Rammohun Roy Library Foundation (RRRLF) leh Mizoram Library Association-te tangkawpin hetiang hun tha a buatsaih chu lawmawm a tih thu a sawi a. Library pawimawihna sawiin, hriatna tipungtu, hmasawnna kawng min zawhtir theitu, zirna leh thiamna lama puitu tha tak a nih thu a sawi a, library-te ngaihhlut leh roh nachang hriat pawimawh a tih thu a sawi bawk. Lehkhabu te a nihna tur dik taka hman an nih chuan an tangkai em em a, mipuite banphak leh chhawr theih tura lehkhabu tha te dahtu chu library a nih thu a sawi a ni.

Minister chuan internet-khawvel-ah kan cheng a, chu chuan kan nun dan a thlak danglam avangin, hmasawnna kawngah nasa takin min pui bawk mah se, chin dan tha lehkhachhiar thlahthlam phah lo turin kalkhawmte chu a fuih a, chutiang a thlen lohna turin library leh a hnathawktute chu an pawimawh thu a sawi. Library chu thu leh hlaa hausakna tipungtu mai bakah thil chhinchhiah leh hriatreng atana pawimawhte dahthatna (record) hmun a ni a, library-a uluk taka sulhnu (history) vawn nachang kan hriat a pawimawh thu sawiin, Mizo history leh nihna(identity) chian lehzualna atan library-te an pawmawh tih a sawi.

Khuallian chuan sawrkarin library-te hmasawnna tur a ngaipawimawh tih sawiin, India ram pum huapa Public Library te tih hmasawnna tur atan Ministry of Culture hnuaia autonomous organization Raja Rammohun Roy Library Foundation (RRRLF) chuan scheme hrang hrang kaltlangin tanpuina a pe chhuak thin a. Heng scheme-te hi Matching Scheme leh Non-Matching Scheme a then niin, Matching Scheme-hi 90:10 ratio-in Central leh State share in kalpui a ni a. Mizoram Public Library te tan scheme hnuaia tanpuina te hi Art & Culture Department kaltlangin kum tin dil thin niin, a rah chhuah pawh kan hmu tam tawh hle a ni.

Building Grant Rs. 6 lakh zelin NGO Library 137 te’n an dawng tawh a. Steel Book Rack (Godrej) pawh Library 426-ah sem tawh niin. Kum tin recognised NGO Library te hnenah lehkhabu thar hrang hrang sem chhuah thin a ni bawk, a ti a. Kum hmasa ah Computer tha tak mai Library 34-ah sem a ni a, digital hmasawnna nen library service tihchangtlunna atan a tangkai hle thu a sawi bawk.

Minister chuan Mizoram chhungah library chi hrang hrang- Mizoram State Library, District library Aizawl, Lunglei, Kolasib leh Champhai-ah te leh recognised NGO library 518 a awm mek thu sawiin, kalkhawmte chu hmang tangkai turin a chah bawk a ni. Library tha thlanna neih a ni thin chu tha tiin, kum 2017 hnua neih a ni tawh lo erawh chu pawi a ti a, thlan chhunzawn a nih theihna turin hmalak tha a tih thu a sawi bawk. Kalkhawmte chu mipui rawngbawl an ni tih inhriaa, ram leh hnam tana ke pen zel turin a fuih bawk a ni.

Inkhawm hi Director, Art & Culture Pi Carol VLMS Dawngkimi chuan kaihruaiin, President MLA, Pu Dr. Lalbiaksanga atangin thusawi tawi ngaihthlak a niin, General Secy., MLA, Pu Dr. Jacob MS Dawngliana hnen atangin report ngaihthlak a ni bawk a ni. Inkhawm hi Mizoram State Librarian, Pu Zothanglawra Ralte chuan lawmthu sawiin a khar a ni.

Inkhawmah hian Library & Information Science subject-a PhD hmu thar chawimawina hun neih a ni a, chawimawina dawngtute chu:

1. Esther Lalruatpuii
2. Ruth Lalthlamuanpuii
3. Lianhmingthangi Hnamte
4. R. Laltlanzova
5. Oliver Lalthlengliana
6. Zorinpuia
7. Lalhmangaihsangi Sailo
8. Lalremsiama
9. Vanlalfeli