1153/2026-2027

Aizawl the 24th June, 2026: Vawiin khan School Education Minister Dr Vanlalthlana hovin School Education Complex Conference Hall Macdonald hill-ah School Education Department Officer ten Quarterly Review Meeting vawi 8-na an nei.

He Meeting-ah hian School Education Minister chuan thusawiin Pathianin kan ram hma lam hun hi zirna lama thawktute kutah a dah a, mawhphurhna kan neih ang hian kan che chhuak em tih inenfiah a ngai a ti a. Meeting ațang hian thil nih dan dik tak an hriat phah țhin tih sawiin Mizoram Education Reforms Committee-in rawtna an dawn te an sawiho țhin thu a sawi a. School-ah kalphung țha kan neih a ngai a, kalphung țha kan hman ngam leh hman theih tur kan duan a ngai a, kan hnunga lo awm zel turte pawhin an hman tur system țha kan siam a ngai a, chumi atan chuan data kan neih țhat pawh a ngai a ni a ti a, MERC pawhin kalphung țha nei turin ngaihtuahna a hmang mek a ni a ti.

Minister chuan Officer kalkhawmte chu thurawn leh rawtna nei țhin turte, thil țhaah chuan huai taka pen chhuak ngam tur leh kal dan țha zawk a awm a nih chuan sawi ngam tur leh infinchhuah ngaihna apianga finchhuah țhin turin a chah bawk. Thil dik lo dan kalha thil tih te a awm chuan kal thui hmaa inhrilha a țha zawk turah chuan insiamțhat hi mitinin kan tih tur a ni a ti.

Minister chuan kan hma lam hunah kan tu leh faten zirna siamțhat a nih ațang khan hei hi kan nei ve thei ta an tih theihna tura ruahmanna neih țhat a pawimawh thu te sawiin hma lam hun atana inzira inchhiar zau turin official te a chah bawk. Minister chuan zirlaite an zirna kawngah an hlawhtling ta lo a nih pawhin eizawnna kawng an zawh theih nan intodelhna project kalpui mek a nih thu leh tun aia zau zawka kalpui dan ngaihtuah a țul thu a sawi bawk.

Education Consultant Rev Dr K. Thanzauva pawhin thusawiin hmasawnna chi hrang hrangte hi han thawk bawk mah ila, rual kan pawl ve theihna tur leh kan ramin ramdang ruala ke a pen ve theihna awm chhun chu zirna hi a ni a ti a. Zirna siamțhatna kawngah kohhran, sorkar leh mipui țanho a țul thu a sawi.

Quarterly Review meeting-ah hian Department hnathawh leh hmalakna chi hrang hrangte thlirho a ni a, School Education Directorate-in hna lakna tura rules leh syllabus ennawn mek an buaipui dan te report a ni a, SCERT, MBSE leh Samagra Shiksha hmalakna te leh hnathawh te thlirho a ni bawk a. Department chhunga hmalakna leh hmachhawp te an sawiho bawk.

Minister hova Quarterly Review Meeting-ah hian Education Secretary Pi Ramdinliani, Education Consultant Rev Dr K.Thanzauva, Mizoram Education Reforms Committee Working Chairman Prof Lalbiakdiki Hnamte te, Mizo Language Development Board Chairman Pu R.Lallianzuala, School Education Secretariat leh Directorate Officer te, SCERT, MBSE leh Samagra Shiksha officer te an tel a, District tina District Education Officer ten video conferencing hmangin meeting hi an lo zawm bawk a ni.