1151/2026-2027

Aizawl the 24th June 2026: Vawiin khan Pu TBC Lalvenchhunga, MLA, Adviser to CM chuan a office-ah Bharat Forge leh Confederation of Indian Industries (CII) ten Darzo khuaa tuihna tihpunna tur project, Corporate Social Responsibility Fund atanga an thawh tur chu a hawng.

He CSR Project hmang hian Darzo khaw ram 1.93 Hectare a zauah ruahtui tlinna tur khur (trenches) 1000 laih tur a ni a, hna hi Young Indian Mizoram ten an thawk ang. Young Indian te hi Confederation of Indian Industry (CII) hnuaia thalai pawl an ni a. He project hi India rama Young Indian ten hetiang lam chi CSR Project an thawh hmasak ber tur a ni.

Pu TBC Lalvenchhunga chuan, Darzo khuaa tuihna tihpunna (Ground Water Rejuvenation) project an rawn kalpui avangin Bharat Forge chungah lawmthu a sawi a. CSR Cell ten hma kan lak tirh ata vawiin thlengin Bharat Forge te hian min thawhpui tha em em a. An chungah kan lawm a ni, a ti a. Mizoramin CSR tam zawk a hmuh theihna tura theihtawp chhuah rengtu CII Mizoram chungah pawh lawmthu sawiin, project hlawhtling tak kan lo beisei dawn a ni, a ti.

Dr. Leena Deshpande, Vice President and Head – CSR, Bharat Forge Limited pawhin thusawiin, Bharat Forge hian thingtlang lamah hmalakna kan la ngah lutuk lo va. Maharashtra state-ah khuan thingtlang khaw 125 velah Livelihood programme kan kalpui mek. Kan CSR te hi hlawk leh tangkai taka hman kan duh a, khuarei daih (sustainable) thil zel tih theihte pawh tha kan ti thin. Darzo project pawh hi vawiina mite leh chhuan lo la awm zel turte tana tangkai tur project a ni a. Tuihna humhalhna leh tihpunna lama hmahruaitu tha tak a nih kan beisei a ni, a ti.

Pu Lalramchhana, VCP, Darzo pawhin thusawiin, he hmalakna hian Darzo khaw tan khuarei thlenga tangkai tur tuihna min tihpunsakin, ramngaw humhalh zelna kawngah min tanpui dawn a. Keini leh kan tu leh fa lo awm zel turte tana project tangkai niin kan hria. Sum rawn thawhtu Bharat Forge leh CII te chungah kan lawm hle a ni, a ti.

Project hawnna inkhawmah hian he Project kalpui tura inremna (Memorandum of Understanding) inhlan tawnna Bharat Forge, CII leh Darzo VC ten an nei nghal a ni.