Vawiin ni 22 November 2019 hian Mizo Academy of Letters chuan Annual Meeting Central YMA Hall, Tuikhuahtlang ah  an hmang a. He MAL Annual Meeting hi Prof. Laltluangliana Khiangte MAL President chuan kaihruaiin, Prof Rualkhuma Colney chuan kum 2019 chhung a MAL chetvelna report a pe a. He hunah hian MAL chuan kum thum dana an pek thin Mizo Academy Award 2019 chu he huna khual lian Pu Lalchhandama Ralte, Minister School Education chuan Pu Lalthangfala Sailo hnenah a hlan a ni. He chawimawina hian Medal, thu chei leh tangka fai Rs. 20000 a keng tel bawk. He huna khuallian Pu Lalchhandama Ralte chuan thinlung taka Pu Lalthangfala Sailo a lawmpui thu leh MAL hun rei tak lo kaihruai a, thu leh hla lamah pawh zofate thu tha tak tak min hnutchhiahtu a nih zia a sawi bawk. Khuallian chuan, MAL chu pawl tangkai leh hlu tak Zofate thu leh hla lama nasa taka min dawm kangtu a ni a. He pawl hi a hlut em a vangin thangthar kan thu leh hlate chhawm nung a paw chhuak zel thei tur te an tel chhoh a pawimawh hle a a hriat thu leh thu tha ziak zel turin ziak mite a sawm bawk. 

He Mizo Academy Award 2019 dawngtu Pu Lalthangfala Sailo hi 16 July 1933 khan apiang a. Thiamna lamah MA niin heng hna te hi a thawk tawh: Lecturer UCC1966-72 Barapni. Lecturer St Edmund College Shillong 1972-73, Principal Champhai college 1973-85. Dy Registrar HEHU 1985-96. 

Pu Lalthangfala Sailo hian hla 50 chuang, lemchan 10 chuang a ziak tawh a. Tin, chawimawina hrang hrang Sangeet Natak Akademi Award 2007, Padma Shri 2009, Bharat Adivasi Drama Award 2012 leh Pu Buanga Award 2015 te a lo dawng tawh nghe nghe a ni. Mizo Academy Award hi kum 1979 Rev Liangkhaia chuan lo dawngin Pu Lalthangfala Sailo hi he chawimawina dawng 13-na a ni ta a ni.

MAL hian chawhnu lamah Mizo Tawng leh Eight Scheduled chung chang sawihona hun hmangin hruaitu thar an thlang nghal bawk.