Assembly Speaker Pu R. Romawia chuan Mizo Doctor-te chet thatna leh an in pekna thuk tak te avang hian Mizo hnamin chawimawina a hlawh thin a ni a ti. He thu hi vawiina Dr. C. Biakmawia, Durtlang Synod Hospital Director hluiin chawimawina ‘Paul Harrison Award’ a dawn lawmna inkhawm Chaltlang Tourist Lodge-a buatsaiha a sawi a ni.

Speaker chuan Christian Medical College, Vellore ten an hnen atanga zirchhuak Doctor te an ngaihven zui thin avanga a lawmthu a sawiin Mizo zinga he college zirchhuakte pawh an hre zui zel chu Mizo tan thil lawmawm tak a ni a ti a. A thawhrim rah avanga hetiang chawimawina ropui tak Dr. C. Biakmawian a dawng chu thinlung taka a lawmpui thu Speaker hian a tarlang a ni.

He huna tel ve Chief Secretary Pu Vanhela Pachuau pawhin mimal taka Dr. C. Biakmawia a hriat thu leh a in pekna leh a thawhrimna te chu Doctor dang leh thangthar ten entawntlak hle a ni a ti.