National Energy Conservation Day chu vawiin khan Kolasib a D.C Conference Hall ah hman a ni a. Energy chi hrang hrangte renchem dan tur sawi ho a ni.

He hunah hian D.C.Pu Dawngliana chuan khuallian niin a hmanpui a. Thu sawiin Energy kan sawi hian electric ringawt hi kan mitthla fo thin a. Kan mithiam te sawi angin energy hrang hrang hydro, lungalhthei, petroleum, natural gas, uranium, thoriums leh non conventional energy tehi a hlutzia kan hriat a kan renchem thiam a ngai a ni, a ti. Pu Dawnga chuan, Mizote nunphung hrim hrimah inrenchemna hian hmun a chang thuk lo hle a. Nakina keimahni hmakhua tur atana khawl kan nih inhre renga kan nitin nuna inren nachang kan hriata, ei leh bar thil te sum ren kawngah tepawh kan inrenchem hle a tul a ni, a ti a ni.

Pu B.Lianthlira, DEO Kolasib in National Energy Conservation Day hmanna inkhawm hi a kaihruai a. Er.Lalduhawma, Executive Engineer, Power & Electricity chuan Energy Conservation chungchang zirtirna thuchah a sawi a. Mithiam ten an chhut danin chawhruala mi tin electric mamawh hi kum 1985 leh 2050 inkarah ngawt pawh za-a 70 velin a pung chho hman dawn a. Fuels mamawh pawh za-a 30 velin a pung tura chhut a ni, tiin Er.Lalduhawma chuan a sawi a. Energy siam chhuah nana hman lar kan hriat tlangpui bakah tui chakna (Micro Hydel) te, thli chakna te, nizung hmang te, bio-gas lamte hi uar chhoh zel a ni, a ti. Khua leh tui kan nih angin energy nasa taka renchem kan tum tur a ni, a ti bawk. National Energy Conservation Day puala District Level Energy Conservation Committee in alo buatsaih tawh High School naupangte tana Painting leh Essay Writing Competitiona titha te hnenah khuallian Pu Dawnga chuan lawmman a hlan bawk a.

Vawiin inkhawmah hian sorkar department hotute bakah tlawmngai pawl hrang hrang aiawhte an kal tha hle a ni.