3800/2022-2023

Aizawl, 10th March, 2023 : Vawiin khan Mizoram State Legislative Assembly-a Mizo Language Development Board (MLDB) Bill, 2022 pass a nih champha vawikhatna pualin MLDB Office-ah Human Resources Development Board Vice Chairman Dr L.Thangmawia, MLDB Chairman Dr Lalzirmawia Chhangte, School Education Officer te leh Mizo tawng lama hmalatu pawl hrang hrang - Mizo Writer Association(MWA), Mizo Academy of Letters(MAL), Mizo Grammar Society(MGS) aiawh ten hun hmangin thingpui an inho.

He hunah hian Dr. Thangmawia chuan thusawiin “Hun rei tak atanga Mizo tawng humhim leh hmasawnna duhtu ten an lo beisei, MLDB Bill chu Chief Minister Pu Zoramthanga thuchah bawhzuiin kum 2019 kum tawp lam atang khan HRD Board chuan buaipui tan a, Ni 10.3.2022-a Mizoram Assembly-a lungrual taka pass a lo ni ta leh pass a nih atanga a kum khat cham kan lo thleng ta chu a lawmawm hle a ni tiin he Bill pass a nih theihnan hian Mizo tawng lama thawktu pawl hrang hrang – Mizo Writer Association(MWA), Mizo Academy of Letters(MAL), Mizo Grammar Society(MGS) te bakah Mizo tawng zirtirtute leh mi thahnemngaite theihtawpchhuahna a ropui tak zet a ni”, a ti a. “MLDB Bill, 2022 chu Assembly-a pass a nih hnu hian HRD Board Chairman Pu Lalchhandama Ralte, School Education Minister kaihhruaina hnuaiah chak taka a function thuai theih nan bawhzui nghal char char a ni a, School Education Department Officer ten Rules tul angte duang chhunzawm nghalin an buaipui char char bawk a, Mizoram sawrkar aiawhin an chungah lawmthu ka sawi a ni, tunah hian Mizo Language Development Board (Preparation and Submission of Budget Estimates Administration of Fund) Rules, 2023 chu peih a ni tawh a, 27.2.2023 khan notification tihchhuah tawh a ni a, Chairman leh Secretary ruat dan tur Rules pawh Law department vet tura thawn mek a ni bawk a, hun rei lo te ah hnathawk theia MLDB hi a awm thuai ka beisei a ni”, a ti.

Mizo language Development Board office tur hian Mizoram sawrkar chuan AIS Transit Building-2, MINECO, Aizawl-ah a ruahman sak a, office chei hi zawhfel ni tawhin ni ni 6.2.2023 khan MLDB office hi luah tan niin Pathian hnena hlanna hun hman a ni tawh bawk. Tunah hian adhoc-in thawktu pathum dah lailawk nghal a ni a, MLDB Controlling Authority Dr Lalzirmawia Chhangte chuan Chairman pangngai tur ruat hma atan MLDB Chairman hna hi a lo hmui rih dawn a ni.

MLDB hi ataka a function theih hunah chuan Mizo tawng humhima tihmasawn tur te, hnam dang tawng Mizo tawnga sengluh dan turte, Mizo Grammar chungchang te, Mizo Literature hmasawnna tur bakah Mizo tawng kaihhnawiha thawhtur awm a piang a thawk dawn a ni.