3799/2022-2023

Siaha, March ni 10 : Nimin chawhma dar 10:30Am khan District Playground, Siaha vaihpi-ah Mara te Kut zinga lawm hlawh ber leh ropui ber Lyuva Khutla chu hlim leh lawm taka hman a ni.

Lyuva Khutla-2023 lawmna programme hi Session hniha then a ni a.Session khatna chu official te thusawina hun deuh a hman niin, Session hnihna erawh chu mit leh beng titlai tura duan a ni.

Kumin Lyuva Khutla-2023 a Azipa (Kut Pa) a tan Pu M.Laikaw,CEM,MADC chu hman a ni.

Lyuva Khutla, 2023 hmanna a mipui kalkhawmte chawnglawmna thu Pu K.Chhihrau, Executive Secretary MADC leh Chairman Lyuva Khutla Organising Board ni bawk chuan sawiin, Pu FC. Zakhai chuan Kut hawnna Hlado a chham a, Pu K. Ngiabei leh Pu K. Thansiama ten Tawtarawt ring taka hamin Lyuva Khutla-2023 chhim tura lo kalkhawm te chu an lo lawmlut bawk a ni.MTP Branch, New Siaha ten Kut hawnna hla mawi taka remin, Rev. T.Salaw, Moderator, ECM Assembly in hunserh a hmang.

Lyuva Khutla-2023 Puanzar chu Azipa Pu M.Laikaw chuan pawtparhin, vawiin Lyuva Khutla kan lawm hian Mara hnam hi hnam taima leh intodelh kan nih thin tih min hriat nawn tir se, la dehthiam tak leh hnam bil incheina sil leh fen nei tha tak kan nihna leh kan hnam ziarang leh lam chi hrang hrang te pholangin chawinung zel rawh se, a ti.

Col.Bejoy RSM.Commandant,3(NH),BN Assam Rifle pawhin thu sawina hun hmangin, Assam Rifle te thupui chu "Friends of the Hill people" tih a ni angin, vawiina Lyuva Khutla hmang tura min sawm hi lawmawm ka ti tak zeta, hei hian kan inthianthatna ti zual zel se; tih a duhthu sawiin, Maraland mipui te hi ramri venna kawngah leh Refugee te duat taka in lo dawnsawnna kawngah hian ka ngaisang hle che u a ni, a ti a. MADC in Golden Jubillee in lawm hunah pawh ka lo kal leh ngei ang,a ti bawk.Col.Bejoy hian pianphung rualbanlo mi 2 te hnenah wheel chair a hlan nghal bawk.

MADC kum 50 tlin lawmna pualin Jubilee dar vawi 50 tum a ni a, thlanbik mi 50 ten vawikhat theuh an tum a ni.Tichuan Session khatna chu hman zawh niin, mipui te mit leh beng titlaitu session 2-na chu a in tan ve leh a ni.

MTP Branch 14 ten a rualin Sawlakia hmuhnawm tak an entir a, Thosai MTP Branch ten Khocheinô Lâ an entirin, Awkhy lâ chu thiam takin New Colony MTP Branch ten an entir bawk.

Lyuva Khutla-2023 pual hian Chhivaw(Miss) leh Khydi(Mister) thlanna buatsaih a ni a. Chhivaw atan Nula Bethsy Nôhro New Colony leh Khydi atan Tv. Joe B.Nôhro, College Vaih te thlan an ni a. Mipa leh hmeichhe naupang Cultural Dress a inchei nalh ber( Beinô & Beipaw) bakah 1st leh 2nd runner up te thlanna buatsaih a ni bawk a. Beinô atan Mari, Siaha Vaihpi-I, 1st Runner Up--K.Thelma,Siaha Vaihpi-III leh 2nd Runner Up--S.Thainô, Meisavaih East thlan an ni a . Beipaw atan Jordan,Meisavaih West, 1st Runner up--Peter Beihrokhu Siakhai,Siaha Vaihpi-I leh 2nd Runner Up--Branson Beihrongia,Siahatlah te thlan an ni bawk. Heng bakah hian costume parade MCHP Branch hrang hrang ten an entir a, cultural dress hmangin fashion show , Vocational School of Education & designing ten an buatsaih bawk a ni.

Programme kar lakah Rock Band Kurapia Band leh Myanmar Idol David Lai bakah Mara zaithiam A.Chhualai, S. Siamkungi, J.Ruby, T. Merrisa, Jessica Ngody Hlychho, Suna Chano, John Litas leh J.Matha ten kalkhawm mipuite zaiin an awih reng bawk a ni.

Pu JB. Chozah, A&CPO chuan lawmthu sawina hun a hmang a, Pu K.Chhihrau, Chairman chuan Kut puanzar la thlain vawiin Lyuva Khutla lawmna hun hi a khar ta a ni.