He thu hi Pu Joseph Lalhimpuia, Parliamentary Secretary, Industries Department chuan nimina Industries Department Handloom Complex, Thenzawla Integrated Skill Development Scheme hnuaia puantah zirlaite hnenah sawiin belhchian dawl leh hnamdangte lakah pawha chhuan tlak, ramdanga hralhchhuah tlak a mizo puan te tah thei tura thiamna nei tura theihtawpchhuah turin a chah bawk a ni.
National Handloom Day hmasa ber denchhena Thenzawl Handloom Complex tlawhtu Pu Joseph Lalhimpuia chuan puantah zir mek te Sawrkar Laipui pawhin a ngaihpawimawh ber te zing ami an nih avangin an pual ni bik a puansak ta hial ani a ti a, National Handloom Day lo chhuah nachhan te pawh sawilangin India hnampa Mahatma Gandhi phei chuan India kutchhuak puan lo chu a ha duh ngailo a ni a ti a, Mizo kutchhuak puan hrang hrangte pawh hi an mawi bakah an chhuanawm hlawm em em a, ramdanga thawnchhuah tlak ni a hriat anih vangin tunah hian Mizoram sawrkar chuan Thenzawla Handloom Complex pawh hi tihchangtluna Mizoram Export Facilitation Hub atana siam tumin hma chak takin a la mek a, hei vang hian puantah tu te pawhin nasa leh zuala tan an lak pawh a tul dawn a ni a ti bawk..
Thenzawl Handloom Complex ah hian Integrated Skill Development Scheme hnuaiah handloom weaver 90 training tir tur niin tunah hian 1st batch mi 40 in training an nei mek a, July ni 20 atang khan training hi tan niin thla li chhung awh tur a ni a, tun ami te training zawh hian 2nd batch mi 50 te training pek an ni leh ang a, training zawh hian tha taka Training zo fel te hnenah Industries Department chuan puantah khawl leh puantahna In sakna tur tanpuina a pe vek dawn a ni.
