1246/2023-2024

Kolasib dated 24th July 2023: Vawiin chawhnu khan Diakkawn YMA Hall, Kolasibah Mizo Students’ Union, District Headquarters Kolasib bultumin College zirlai titha te lawmpuina hun neih a ni a. Minister Pu K.Lalrinliana chu Khuallian niin Pu Laldinsanga, Vice President, MSU General Headquarters chu Uaptu a ni bawk.

Khuallian Pu K.Lalrinliana, Minister, Food, Civil Supplies & Consumer Affairs Department chuan zirlaite chawk phur thei tur a hlawhtlinna changte lawmpuina hun Zirlai pawl in an buatsaih thin chu lawmawm a tih thu a sawi a, chawimawi tur thahnem lehzual an awm theih nan zirlaite pawh tan la zel turin a fuih. Minister chuan khawvelah thiamna a than chak thu sawiin hlawhtlinna chang tur chuan midang aia thiam filawr nih a tul tawh thu a sawi a, Exam paltlang satliah aiin thiamna tak zir chhuah a pawimawh thu a sawi.

Pu K.Lalrinliana chuan ramri inthen dan avangin zofate chu ram hrang hrangah thendarh a an awm thu a tarlang a, heng hmun hrang hrang a zofate thinlungah hian inpumkhat tur a hmasawn duhna a pun mek thu sawiin hemi kawng a zirlai pawlte hmalakna chu fakawm a tih thu a sawi. Hmun hrang hrang atangin Mizoram chu In pui anga ngai a rawn raltlante chung ah that chhuah a, theih ang anga lo tuamhlawm chu unau kan nihna anga kan mawhphurhna a nih thu Minister chuan a sawi a, Zofate tan a In pui, Mizoram hi ram ropui a nih theih nan tun a zirlaite hian thiamna chhawrtlak an neih te, intodelhna kawng an thanharh te leh mahni intungding tur a thawhhreh neih loh intihhmuh te a pawimawh thu a sawi. Ni 25, July 2023-a Manipur-a zofate thlavang hauhna lantir nana ram pum huap kawngzawh buatsaih tur chu ngai pawimawh a, mahni phaktawk theuh a lo tawiawm ve turin kalkhawmte chu Minister hian a chah bawk a ni.

Pu T.Zahmingliana, Principal, Govt. Kolasib College pawhin he hun ah hian thu sawiin pawn lam atanga zirlaite nen a zirna kaihhnawih ni lo program buatsaih tam tak awm thin chuan a tha lo zawngin zirna a nghawng theih thu a sawi a. Hneh tak a zirtirna kalpui a nih theih nan zirtirtute chuan hunbi duansa an zawm a tul thu leh chumi bawhpelhna chuan zirlaiteah harsatna a thlen phah theih thu a sawi bawk a ni.

Vawiin zirlaite lawmpuina hun buatsaih ah hian Pu Lalthangmawia, President, MSU, Dist. Headquarters, Kolasibin kalkhawmte lawmna thu a sawi a, Pu Laldinsanga, Vice President, MSU General Headquarters in zirlaite fuihna thu sawi bawkin Pu Joel Vanlalmuanpuia, Vice President, MSU, Dist. Headquarters-in lawmthu sawina hun a hmang bawk a ni. Academic session 2022-23 chhung a Govt. Kolasib College atanga zirlai titha zual thlan chhuahte hnen ah lawmpuina hlan a ni a. B.A pass zirlai 12, B.Sc pass zirlai 4 leh BCA pass zirlai 1 hnen ah lawmpuina thuziak hlan an ni.