1247/2023-2024

Lunglei 24th July 2023 : Vawiin khan Mizo Upa Pawl Bazar veng, Lunglei te chuan an dinchampha vawi 47-na chu Saikuti Hall-ah hmangin Agriculture Minister Pu C. Lalrinsanga chuan khuallian niin a hman pui.

He hun hi MUP Bazar Veng President Pu V. Vanthuama'n a kaihruai a, khuallian Pu C. Lalrinsanga chuan MUP te hlutna sawiin ramin an thu leh hla ngaihpawimawh a tul thu sawiin khawvel ram changkang zawkah kum upa ten ngaihlut an hlawh thin thu sawiin mizote pawhin kum upa tawn hriat ngahte chu ngaihhlut nachang hriat a ngaih thu a sawi a ni. MUP te chu an dam chhunga hun hlimawm an hman bakah thih hnu piah lamah pawh hun tha zawk leh nuam zawk an hman chu a ngaih pawimawh sak thu Pu C. Lalrinsanga  chuan sawiin thianghlimna, tlawmngaihna leh intodelhna kawnga kan pi leh pu ten ngaihdan tha tak an lo neih chu vawn him zel a pawimawh thu a sawi bawk. Khawtlang inrelbawlna  te leh hmasawnna kawnga hmalakna hrang hrangah mipuite finchhuah tu ni zel turin a sawm a ni. Upate chu an hlu a, an zahawm a, hei hian ram leh hnam a ti zahawm a, upate chu induh larh turin a chah a ni. Kikawn (Bazar Veng) a RKVY hnuai a Market Shed sak chhawng hnihna chu MUP Bazar Veng ten a tul anga an hman atan a hlan a ni. Pu C. Lalrinsanga chuan Lunglei Municipal Council chungchang sawiin LMC hian Lunglei hmasawnna tura hmathlir thui tak an nei chu lawmawm a ti a, Lunglei khawpui hmasawn nan theitawp chhuah theuh turin a chah bawk a ni.

He hunah hian Pu Lalzuithanga, Chairman LMC leh Pu B. Lalchungnunga, President Mizo Upa Pawl Hqrs, Lunglei bakah VC, YMA leh HMIP Bazar Veng aiawh ten thusawi an sawi bawk. MUP Bazar Veng ah hian member 315 awmin kum 107 dam 1 an awm a ni.