Chief Minister Pu Lal Thanhawla chuan ‘tun hma in Mizote hi kan in puk ping zung zung a, ZIDCO te pawh kan puk kulcho der a. Housing loanah kan in puk hming chhe hle bawk a ni’ a ti. He thu hi nimin tlai Vanapa Halla Mizoram Rural Bank in an din champha kum 29-na - Mizoram Rural Bank Day - lawmna a hmanpuina a a sawi a ni.

Chief Minister chuan loan kan rulh that lohna hi kan rinna nen a inkalh tlat a ni tiin, kan Bible pawhin puk a phal a, mahse kan rulh that a phut a ni a ti a. Mizoram Rural Bank (MRB) hi kum 29 chhunga bank thangduang tak a ni hi a lawmawm hle a ni a ti a. State Bank of India zulzuia mipuite tana hamthatna, community service banking a corporate social responsibility scheme an kalpui chu mipui tan hnemhnanna tha tak a ni a ti a. Chhungkaw khawsak harsa zualte tana branch tinin class IX leh X zirlai 2 zel an zir man an tum sak (sponsor) chu a lawmawm a tih thu sawiin, central YMA hnenah mitthi ruang phurhna motor, Morgue Van an pe bawk chu a lawmawm tak zet a ni a ti.

Bank lian tak tak te hi dawr an harsat thin avangin thingtlang mi kuthnathawktute tangkaipui tur, MRB hi Gramin Bank an tih, microfinancing lam, Bangladesh mi Mohammad Yunus a hmuhchhuah ang deuha, dahkham ngailova kalpui dan awm thei se tiin, Chief Minister chuan a duhthusam a sawi bawk a. MRB hi a than duan chhoh zel theih nan mipui ten thiam tak leh dik taka kan hman a tul hle a ni a ti.

MRB in zirlai naupang an sponsorte hnenah thilhlan ‘Dictionary’ an pek leh Hnuchham In (orphanages) te hnenah thilpek an hlan bawk chu Chief Minister chuan a lawmawm tak zet a ni a ti.

MRB Chairman Pu Bhupen Deka chuan thingtlang mite dinhmun chawikang turin MRB hi 27th September 1983 khan din a ni a ti a.Hawn tirha an ‘share capital’ chu Rs.1 Crore chauh a ni a ti a. Tunah hian branch 65 awm tawhin, 6 dang hawn belh leh tura hmalak mek a nih thu a sawi bawk.

Zirlai an sponsor te hnena Dictionary an pekte hi Chief Minister nupui Pi Lal Riliani’n a sem a ni.

Khualzahawm Social Welfare Minister Pu P.C.Lalthanliana chuan Hnuchham enkawlna in 8 ah MRB thilpekte hi a hlan a, thusawina a nei bawk a ni.

MRB kum 29 a tlin lawmna ah hian Bihu Dance leh Cheraw te entir a ni a, malzai leh ahuho zai te, keyboard tum rimawite ngaihthlak a ni bawk a, zanriah buatsaih a ni bawk a ni.