Vawiin khan Saikuti Hall Lunglei ah Mizo Upa Pawl Hqrs. Lunglei Assembly vawi 43 na hman a ni. Pu Lal Thanzara, Health & Family Welfare Minister chu khuallian niin Pi Lalzarmawii IAS, Deputy Commissioner Lunglei chu khual zahawm a ni. 

Khuallian Pu Lal Thanzara chuan thu sawi in kan ram in tlawmngai pawl duhawm tak tak YMA, MHIP te ang a Upa Pawl zahawm leh thianghlim a hun a sawrkar finchhuah thin Mizo Upa Pawl kan nei che u hi kan vannei in a lawmawm takzet a ni. Kum upa te hi kan hnam rohlu leh Ram leh Hnam ti zahawm tu in ni. Hnam changkang apiang in kum upa te hi an ngaihlu in an duat thiam a, upa te sam tuak thleng a dam te hi Pathian malsawmna a ni. Mihring kan nih chhung hian upat leh tar te hi ngai a neih mai theih a ni lova, kan nun a thil dang kan tawn ang bawkin mahni in her rem a awmdan tur te pawh a zir a zir ngaih na lai tepawh a awm ve fo a ni. Billy Graham kum 90 mi chuan i lo upat zel hi Pathian in i tan a a ruat ah pawm la, nitin ni thar a pek che avangin lawmthu sawi ziah ang che tiin upa te thurawn a pe.Bible in damreina min pek hi Pathian thilthlawnpek a ni ati. Upa te harsatna hrang hrang sutkian na thaber chu tawngtaina a ni, Pathian ah innghat ila chu chuan kan rilru a ti hahdam anga, midang tan hnawksak ni lovin malsawmna thlen tu nih tum ang u ati. Mizoram Sawrkar in upa te hi thlahthlam lovin a ngaihtuah a, Lunglei Civil Hospital ah Mizoram a a hmasa ber atan Elderly Ward khum 10 awm na siam a ni a, Audiometry Unit te hawn a nih bak ah Social Welfare Department pawhin Upa te theihtawp in hamthatna awm ang ang te a ngaihtuahsak mek bawk a ni a ti. Kan khawvel hi upa te tel lovin a kal thei lova, thangthar ten zah in duat hle turin a chah bawk a ni. inkiltawih leh in dawm kun lovin kum 70 chunglam tan pawhin Pathian remruatna ang in mi ropui leh thil ti thei kan ni thei a ni a ti bawk. 

Khual zahawm Pi Lalzarmawii, IAS Deputy Commissioner Lunglei pawhin thu sawi in Lunglei District in a kan mamawh em em Elderly Ward , Audiometry bak ah thil dang dang min tih sak avang hian kan Health Minister chung ah lawm thu ka sawi a, Ram changkang apiang in ai a upa te an duat in an ngaihsak a, upa te zah thiam hi an lungawi in an thla a muang thin a, District Administration ah fin chhuah a tawiawm theuh turin upa kal khawm te chu a ngen bawk a ni. 

Pu RK Thanga President MUP Gen Hqrs, Aizawl pawhin thu sawi in MUP Hqrs Lunglei te nen boruak tha tak leh  thawh hona tha an neih avangin lawmthu a sawi a, Mizoram sawrkar in upa te min ngaihsak a, sawrkar finchhuahna ah te min telh ve thin avangin lawmthu a sawi a, upa te hi midang te tan malsawmna ni theuh turin ka chah bawk che u a ni a ti.  Dr.Eric Zomawia, State Nodal Officer chuan upate leh hriselna tih thupui hmang in thu a sawi bawk a ni. 

Inkhawm hi Pu Sanghlira Colbert President, MUP Hqrs Lunglei in kaihruai in Pu B.Dangliana, Gen Secy MUP Hqrs Lunglei in report pe in MUP Hqrs Lunglei ah hian Unit 133 ding in member 10014 an awm a, kum 100 leh a chunglam dam pakua(9) an awm a ti bawk.