Ramhlun Market Building leh DLAO Office, Ramhlun North inkarah MIZOFED LPG Showroom thar chu nimin khan Cooperation Minister Pu J.H.Rothuama’n a hawng.

MIZOFED Showroom thar hawnna inkhawm an Chairman Pu K. Lalchamreia kaihhruaiah Khuallian Pu J.H.Rothuama chuan Ramhlun North khawtlang hruaituten phal taka MIZOFED Showroom sak nan ram an pek chungah lawmthu a sawi a. MIZOFED chu mipuite rawngbawltu an ni tih hre reng chunga taima leh thahnemngai taka thawk zel turina chah bawk. Cooperative Society reng rengte chu an thawh tam poh leh hlawkna a tam a, tun dinhmunah erawh Mizoramah chuan Cooperative Society reng rengah sorkar share a la tam hle a; chuvang chuan hlawk lehzual theihna tur kawng dap thiama hma la zel turin a fuih a ni. Mizoram Cooperative movement hi a la naupang viau naa rampum huap pawhin Cooperative Society hrang hrangten kumtin lawmman an la thin chu an chhuanawm tak zet a ni, a ti. Mizoram mipuite tan innghah ngam tak takna ni thei turin tan i la zel ang u tiin Pu J.H.Rothuama chuan MIZOFED hotute leh hnathawk zawng zawngte chungah lawmthu a sawi bawk a ni.

MIZOFED hian District 6 - Aizawl, Champhai, Kolasib, Serchhip, Saiha leh Mamit - ah te LPG Showroom a nei mek a. Tun dinhmuna MIZOFED Consumer neih zat chu : Aizawl-ah 23,026; Champhai-ah 12,977; Kolasib-ah 8,578; Serchhip-ah 11,190; Saiha-ah 12,381 leh Mamit-ah 5,152 a ni a. Kum 2012-2013 chhunga an hlawkna (Net profit) hmuh dan chu hetiang hi a ni : Aizawl - Rs.5,632,398; Champhai - Rs.1,471,562; Kolasib - Rs.1,912,727; Serchhip - Rs.1,601,380; Saiha - Rs.2,461,982 leh Mamit - Rs.1,742,291 a ni. LPG Showroom hawn thar hi 2008 atanga sak tan niin cheng nuai 26.91 senga sak zawhfel a ni.