Pachhunga University College a Sociology Department leh Psychology Department tangkawpin ni 2 awh tura an buatsaih National Seminar on Rethinking Social Change : Recent Trends and Emerging Perspectives chu vawiin chawhma dar 9:30 khan tan a ni a. Seminar hi P.U.College Seminar Hall-ah neih niin Khuallian Dr. Tawnenga, Principal, P.U.College chuan seminar chhung hian thil pawimawh tak tak zir chhuak turin a chah.

Inlawmna thu sawitu Dr. R. Lalthangliana, Organizing chairman pawhin India ram chhunga hnam hrang hrangte nunphung inthlak danglam dan leh hnamzia lo danglam dan mithiamte nen zirho a nih tur thu sawiin, hnam zia leh nunphung mai bakah, sakhaw biak dan te, zai leh rimawi te thleng hian engtiklai pawh a danglam reng a nih avangin he seminar a thu zirte hi a pawimawh dawn hle a ni, a ti. He seminar-in a tum ber chu India rama hnam hrang hrangte hmasawnna leh an nunphunga inthlak danglamna (change) thleng te hi uluk taka zirho hi a ni, a ti.

Thupui sawihawngtu Prof. A. Bimol Akoijam (JNU, New Delhi) chuan hnam khat leh chi khat zinga hmasawnna leh inthlak danglamna lo awm chhan hrang hrang chu mihring inkungkaihna vang a ni thin, a ti a, hnam nun inthlak danglamna leh ram hmasawnna atan hian mihring inkungkaihna a pawimawh zia leh hmeichhiate pawhin pawimawhna an nei tih a sawi bawk. Prof. A. Bimol Akoijam chuan rambuai laia khawkhawm chungchang sawi langin India sorkarin remchanna tur ngaihtuaha a tih a nih a rinthu a sawi.

Pachhunga University College buatsaih ni hnih chhung awh tur National Seminar-ah hian Mizoram chhung leh India ram hmun dang atanga lokal mithiamte paper 23 zirho a ni ang. He seminar hi UGC bultum a, Pachhunga Unversity College a Sociology Department leh Psychology Department buatsaih a ni.