Vawiin khan Sports Minister Pu Robert Romawia Royte chu Mizoram Bharat Scouts & Guides (MBS&G) Vice President ni turin State Chief Commissioner, (MBS&G) Pu Zothanmawia chuan Minister pisa-ah a lawm lut.

Sports Minister Pu Robert Romawia Royte chuan rinawmna thu tiamin Vice President nihna hi a pawm a ni. Minister chuan thu sawiin, Mizoram Bharat Scouts & Guide in a pisa-ah lawm luhna hun an buatsaih chu lawmawm, a ti a. Scouts & Guides chu khawvel pum huap pawl niin, Mizo thalaite tan pawha service pawimawh tak nei, ram chhanchhuahna atana tangkai em em, nunkawng dik zawh inzirtirna leh sikul naupangte tana nun ze ding chhuak tura in enkawlna leh nun chhe tur invenna leh infuihna a ni, a ti a. Minister chuan MBS&G chu nakina Mizoram in Fitness Day a hman huna tel turin a sawm nghal a ni.

State Secretary, MBS&G Pi Saizampuii pawhin thu sawiin, naupang laia Scouts & Guides a tel tawh chu ram khua leh tui tha anni tlangpui a, Pathian tana mi inpe leh missionary te pawh tam tak an awm a ni, tiin a sawi.

Vice President, MBS&G lawmluhna-ah hian State Council Member Pu Vanlalrova, State Training Commissioner (Guide) Pi Lalnunsiami Pachuau, State Organising Commissioner (Guide) Pi Zodinthari Ralte, State Organising Commissioner (Scouts) Pu Lalthlanthanga leh Assistant State Organising Commissioner (Scouts) Pu Zothansanga te an tel a ni.

MBS&G hian tun dinhmunah member 5000 vel neiin, school naupangte an ni tlangpui a, mi tupawh heti lama tui mi leh mi in pe chu State Council Member a nih theih a, Vice President atan hian Office nihna in a ken tel angin Sports Minister, Education Minster leh Chief Secretary te an ni thei a ni.

Kum 1932-ah Baptist Missionary Rev. R.J Raper chuan Mizorama a hmasa ber atan First Scouts Troop, Serkawn-ah dinin, Kum 1941-ah Girl Guide Company hmasa ber chu Pi Teii School (P.C. Girls’ School)-ah Mrs. G.R. Roberts, Missionary chuan a din a. Kum 1974-ah State Association din a ni a, October Ni 17, 1974-ah State Council Meeting hmasa ber neih a ni a, State-a a lu ber chu Patron (Governor) a ruat a ni a, President atan Chief Minister a ni a, district tinah District Association din niin, District Education Officer (DEO) te chu District Chief Commissioner nihna pek an ni.

Vawiin ni vek khan  School Education Minister Pu Lalchhandama Ralte chu a Office Chamber-ah Mizoram Bharat Scouts & Guides Vice President atan lakluh ani ve.

Attachment

  • Loading attachment...