Vawiin hian Serchhip DC Conference hall ah vawiin veka India Prime Minister Pu Narendra Modi-an Gujarat-a a hawn tak Pradhan Mantri Shram Yogi Maan Dhan (PM-SYM)  hawnna inkhawm buatsaih a ni a. Pi Sangchhin Chinzah, Serchhip Bawrhsap chu khuallian a ni.

Pi Sangchhin Chinzah chuan, PM-SYM chu India khua leh tui, hnathawh mumal tak nei lova inhlawhfa leh eizawng, thlakhata Rs. 15000 la lut tling pha lote tana Pension Scheme a nih thu a sawi a. Khua leh tui kum 18 atanga kum 40 inkarte tana thlatin sum tlem te te Bank kaltlanga dahluha, kum 60 tlin atanga thlatin Rs. 3000 leh a aia tlemlo Pesion Fund dawn theihna a ni, a ti a. Vawiina he Scheme hi India Prime Minister chuan Gujarat State atangin vawiin hian a hawng dawn a ni, a ti bawk.

Serchhip-a he Scheme hawnna buatsaih tur hian Ministry of Labour & Employment Assistant Director Pu David Lalfakzuala leh a thawhpuite Aizawl atangin an rawn tel a. An ni hian kalkhawmte hmaa he Scheme thar chungchang hi sawifiahna neiin kalkhawm ten an thil hriatchian duhte zawhna hun an nei bawk a ni.

PM SYM hi hna thawh mumal nei lo (unorganised workers) te tana Pension Scheme a ni a, khua leh tui kum 18 atanga kum 40 inkar ten thlatin pawisa tlem azawng, a tlem ber thla tin Rs. 55 leh a tam ber thlatin Rs. 200 an dah thei a. A dahtute kum zat a zirin an dah tur zat pawisa hi a inang lo deuh hlawm ani.  An sum dahluh zat zel hi sawrkar laipui chuan a doletna a lo dah ve a, tichuan, kum 60 an tlin hnua thlatin Pension fund angin an la thei dawn a ni.

Registration hi Common Servicing Centre kaltlanga tih tur ani a, District chhunga CSC hrang hrangten tunah hian an tihsak thei nghal a ni.

Vawiina PM SYM hawnnaah hian Serchhip-a Head of Offices te, VC aiawhte, tlawmngaipawl aiawhte, kuthnathawktute, chanchibumite leh midang engemawzat an tel a ni.