Vawiin chawhma khan Ahmedabad-ah Prime Minister Shri Narendra Modi chuan pension scheme chi khat Pradhan Mantri Shram Yogi Maan-dhan (PM-SYM) a hawng a. Hemi pual hian India ram hmun hrang hrangah hun hman niin Mizoramah pawh MYC Conference Hall, Khatlaah hun hman a ni a. Labour Employment, Skill Development and Entrepreneurship Department (LESD&ED) Commissioner & Secretary Pu Zothankhuma chu Khuallian a ni.

Khuallian Pu Zothankhuma chuan kuthnathawktute leh hnadang thawk, thla khata cheng 15,000 aia tam lo thawkchhuak thin ten hamthatna an dawn theih nana Ministry of Labour & Employment hmalakna a nih thu sawiin pension scheme huamchin ten thahnemngai taka an inziahluh a beisei thu a sawi a. Tunkum February atanga tan a nih thu a tarlang a. Mizoramah pawh hlawhtling taka pension scheme hi kalpui a nih ngei a beisei thu a sawi a ni.  

Programme hi LESD&ED Addl. Secretary Pu C. Lalpeksanga chuan a kaihruai a. Khuallian hian  Pradhan Mantri Shram Yogi Maan-dhan (PM-SYM)-a inziaklut tawhte enrollment certificate a hlan a. LESD&ED Director Pu Lalhmunsanga Hnamte chuan scheme chungchang presentation a pe bawk a ni.

Pradhan Mantri Shram Yogi Maan-dhan (PM-SYM) hi sawrkar laipui pension scheme pawimawh tak a ni a, Ministry of Labour & Employment hmalakna niin Life Insurance Corporation of India leh CSC e-Governance Services India Limited (CSC SPV) nena tangkawpin an kalpui a. February Ni 15, 2019 atang khan kalpui tan niin vawiin hian Prime Minister in a hawng a ni. He pension scheme hian unorganised sector huamchhunga hnathawk zawng zawng (kuthnathawk hrang hrang leh nitin mahnia inhlawhchawp te – street vendors, construction workers, handloom workers, taxi drivers, etc) thla khata cheng 15,000 aia tam lo hlawh tana ruahman a ni a. India ramah hian unorganised sector hnuaiah mihring maktaduai 42 vel awm anga chhut a ni.

Dil thei:

He scheme dil turte chu unorganised sector hnathawk an nih a ngai a, kum 18-40 inkar an ni tur a ni a, thla khatah cheng 15,000 aia tam lo an hlawhchhuak tur a ni. Dil duh chuan Aadhar card leh Savings Bank Account/ Jan Dhan account a nei tur a ni. Employee Provident Fund (EPF)/ National Pension Scheme (NPS)/ Employees' State Insurance Scheme (ESIC) hnuaia inziaklutte tan a dil theih loh a ni.

Pension scheme hnuaia inziaklutte account atangin thlatin pawisa ruahmansa ‘auto-debit’ hmangin chhungluh thin a ni ang a, sawrkar laipui pawhin a hnuaia tarlan ang hian matching share a dah lut ve ang a. Kum 60 tlin hnuah thlatin a tlem berah cheng 3000 a lak theih dawn a ni.

Common Service Centre (CSC) kaltlanga inziahluh tur niin Mizoramah hian Common Service Centre (CSC) 355 a awm a. Tun dinhmunah hian mi 323 an inziaklut tawh a ni. Hrechiang duh chuan Common Service Centre (CSC) tlawhin a inziahluh theih a, 18002676888 (Customer Care) ah biak theih niin  ShramYogi@nic.in ah hriatchian theih a ni a. Ministry of Labour & Employment website- https://labour.gov.in/ ah kimchang takin tarlan a ni bawk.