Vawiin khan Power & Electricty Department hnuaia chhimlam enkawltu Lunglei Power Circle (LPC) hnuaia engineers-te chuan Tourist Lodge Conference hall, Zotlang, Lunglei-ah a vawi khat atan ‘Energy Accounting of Southern Mizoram’ chungchang an zirho a ni. He hun hi Engineer-in-Chief, P&E Dept. Er.Liannghinglova Pachuau-in a hmanpui a, amah rual hian Er.Vanlalhruaia, Chief Engineer (System Operation) leh Er.H.Zoliana, SE (Planning) te pawh he hunah hian an tel ve a ni.

Vawiina Energy Accounting training hawnna Er.R.Lalrema, SE (LPC) kaihhruaiah E-in-C Pu L.Pachuau chuan P&E hnathawk zawng zawngte chu uluk leh taima taka thawk zel tura chahin kawlphetha zawrhchhuah atanga sum lo lut vawn fel (energy accounting) hi kan hna pawimawh tak pakhat a ni, a ti a. Kum 1991-a India ram sum leh pai dinhmun a tlakchhiat (economic crisis) vakna chhan ber pawh a thlawna kawlphetha luangral hnem lutuk kha a ni a, chuvangin Electricity Act, 2003 hmangin Power Department hi sumdawng thei turin ‘corporation’ ah leh vek tura thupek a ni nghe nghe a. Department dangte ang lovin P&E Department chuan hlawk tumin thawk tur kan ni, a ti. Kawlphetha a thlawna luangral tam lutuk chuan ram sum leh pai dinhmun a khawichhiat theihzia sawiin E-in-C Er.L.Pachuau chuan Mizoram sum leh pai dinhmun titha tur pawhin P&E Department ten an kawlphetha semchhuah leh a man khawn lamah kan taimakin kan rinawm a tul tak meuh a; hei hian Mizoram State Budget pawh nasa takin a siam tha thei a ni, a ti.

LPC hian kawlphetha a dawn theih zat (receiving capacity) chu 20MW a nih laiin a pekchhuah zat (total demand) chu 15MW a tlin tawh thu SE(LPC) Er.R.Lalrema chuan sawiin Lunglei District hmasawnna atana pawimawh em em kawlphetha-a hmasawnna hi sawihmaih chi a ni lo, a ti.

Tun dinhmunah hian Lunglei Power Circle chuan Division 3 neiin 11KV Feeder 44 a awm a. Heng enkawltu tur hian JE 20, SDO 9, EE 3 leh SE 1 an awm a ni. Lunglei Power Circle chuan Khaw 341 leh Veng 36 a chawm a, a zavaiin Consumer 42,484 a chawm a ni.

Vawiina Energy Accounting training-ah hian Feeder enkawltu tur bik Manager ruat tur a nih thu leh chungte chuan thlatin Report felfai taka an ziah dan tur zirtir an ni a. Energy Accounting Report-ah hian thlatin kawlphetha dawn zat, hralhchhuah zat, bill zat, man khawn zat, hralhna rate bakah kawlphetha hlauh zat te ziahluh vek a ni dawn a. Hei hian thlatin P&E Department hnathawh that leh that loh tehfung atan hman a ni thei a dawn a ni.