Chief Minister Pu Zoramthanga chuan nimin tlai khan New Delhi ah Ministry of External Affairs a Foreign Secretary Pu Harsh Vardhan Shringla leh a thawhpuite hmu in, ram thenawm Myanmar nen a inlaichinna leh a kaihhnawih thu pawimawh tak tak an sawiho.

Chief Minister chuan kum 2008 April thla a India leh Myanmar sorkarin inremsiamna an ziah hnu a Kaladan Multi-Modal Transit Transport Project thawh mek chuan zawh lam pan tawh mahse hmun thenkhatah, a bik takin Myanmar ram lama hna kal muang deuh awm chu chak zawka thawh a nih a, he project hi zawh thuai a nih nan India sorkarin hma la se tiin rawtna a thlen. Myanmar leh Asia chhimchhak ram dangte nen inlaichinna tha zawk India in a neih theih nana Act East Policy siam chuan hmarchhak statete chu luhka pawimawh takah a siam tak avangin kawng hrang hrangah hmarchhak state te hi ngaihpawimawh leh zual a tulna a sawi bawk a. Myanmar border a Chin State leh Mizoram a chengte chu hnam inunau an nih avangin ram pahnih inlaichinna atan he state pahnihte inlaichinna tihngheh chu a pawimawh tel thu a sawi. Chief Minister chuan Myanmar leh India insumdawn tawnna a lo than len zel theihna turin lirthei leh mihring tan awlsam zawka border an paltlang theih dan tur ngaihtuah pawimawh a tih thu meeting-ah hian a sawi bawk a ni.

Chief Minister hi Planning Vice-Chairman Pu H. Rammawi leh official dangten an tawiawm a ni.