2547/2023-2024

Vawiin ni 30th October atanga 5th November, 2023 chhungin India rampumah Vigilance Awareness Week, 2023 hman a ni dawn a. Kumin Vigilance Week thupui chu - 'Hlemhletna hnawl la, ram tan thawk rawh' (Say no to corruption, commit to the Nation) a ni.

Ram hmundangte rualin vawiin chawhma khan Mizoramah pawh 'Vigilance Week 2023' hawn nan Chief Secretary Dr. Renu Sharma kaihhruaina hnuaiah Mizoram Secretariat, MINECO-a sorkar hnathawk, officials and staff zawng zawngten a huhovin 'Integrity Pledge' thuchham an chham rual a. Sorkar office tina Heads of Office-te pawhin an hnuaia thawk officer leh staff-te nen anmahni office hmun theuhah 'Integrity Pledge' hi an chhamrual bawk a ni.

He Integrity Pledge hmang hian sorkar hnathawk tupawhin hlemhletna a do tlat tur thu te, sorkar dan leh thupek anga dik leh felfai taka hnathawh a tum tur thu te, mipui rawngbawlna a ni tih hriain a nungchang leh hnathawh danah te mawihnai tak leh midangte entawn tlaka awm turin leh hlemhletna thil a hmuh emaw hriat te chu ngawih bosan mai lova, sorkarah report ngei turin thuchham an chham a ni.