3020/2024-2025

Aizawl dated 15th November 2024: Tukin khan Mizoram Secretariat Building - 1, MINECO tualzawlah Social Welfare & Tribal Affairs bultumin thingtlang khua (Tribal chenna khua) tih hmasawnna tur scheme, DHARTI AABA JAANJATIYA GRAM UTKARSH ABHIYAN chu Pu H Lalengmawia, IAS, Chief Secretary chuan a tlangzarh a. Pi Zonunthari, Joint Secretary chuan tlangzarhna hun hi kaihruaiin Pu Rajesh Kumar Singh, Joint Secretary, Ministry of Panchayati Raj leh he scheme kalpuitu tur Department hrang hranga thawktute he hun ah hian an tel a ni.

Mizoram Chief Secretary Pu H.Lalengmawia chuan hmasawnna rualkhai siam tur a Sawrkar laipuiin thingtlang khua ngaih pawimawhna tur scheme thar tlangzarh thei a duan a ni chu lawmawm a tih thu a sawi a. Scheme awmsa engemaw zah chak lehzual a kalpuina tur a tih a nih avangin State, district leh block level-a Sawrkar a mawhphurna neite inkar ah thawhhona leh tanrualna tha neih a pawimawh thu a sawi. Chief Secretary chuan he scheme hi a nihna tur tak a hman a nih theih nan leh hlawhtling tak a kalpui a nih theih nan kawng hrang hranga mawhphurna changtuten uluk tak a zirchiang turin a chah a, Mizoram tan a hmasawnna tluantling thlentu hmanraw tangkai a hmang turin kalkhawmte a fuih bawk a ni.

Pu Rajesh Kumar Singh, Joint Secretary, MoPR chuan India ram tihmasawn tur chuan a chhung a khaw hrang hrangahte hmasawnna rualkhai a awm a pawimawh thu a sawi a. Chumi atan chuan PM DAJ-GUA scheme chu hmanraw tangkai tak a nih tur thu a sawi.

PM DAJ-GUA Scheme hi kum 5 chhung kalpui tur a ruahman niin India ram a thingtlang khua 63843 tuam tur a duan a ni a. Mizoram a khua 383 a tuam tel ve dawn a, scheme kalpui nan hian Rs. 79156 Crore ruahman a nih thu tarlan a ni. Hmasawnna kalpui tur a huam hrang hrang zingah hmasawnna ruangam thar bun te, thingtlang khawsak dinhmun chawikan te, zirna leh mipui hriselna tihhmasawn te a tel a ni.