3019/2024-2025

Saitual, the 15th November, 2024: Tukin dar 7:00 am khan Prime Minister Narendra Modi chuan New Delhi ah Sawrkar laipui scheme thar PM Dharti Aaba Janjatiya Gram Utkarsh Abhiyan (DAJ-GUA) a hawng a, hemi rual hian Saitual District-ah pawh District bawrhsap Dr. Lalngura Tlau hoin a hawnna hun hman a ni.

Dr. Lalngura Tlau chuan kalkhawmte hnenah lawmthu a sawi a, PM DAJ-GUA sawi zaunna leh a hawnna hun a hmang nghal a ni. Bawrhsap chuan Mission Antyodya in khaw hrang hranga zirchianna an neih hnua chhawmdawl ngai awm an hmuh atanga he scheme hi lo piang a ni tih a sawi a, kum 5 (2025-2028)  chhunga kalpui tur niin ministry 17 an tel bawk a ni, a ti. He scheme hi scheme danga hamthatna dawng thei dinhmuna ding la dawng kim si lote tanpuina a ni tih sawiin he scheme hian thil tum lian pali (4) neiin, kawngpui leh a kaihhnawih siamthat, buh leh thlai thar lama hmasawnna te, zirna tha a awm theihna tura hmalaknate bakah hriselna kawnga hmasawnna tur hrang hrangte a huam tel bawk tih a sawi. He scheme kalpui tur hian Saitual district chhunga khaw 40 zingah khaw 32 thlan an ni a ti a, Saitual district tana hmasawnna a lo nih ngei a beisei thu Bawrhsap chuan a sawi a, line department te pawh a hlawhtlin theih nana theih tawp chhuah turin a sawm nghal a ni.

He scheme hawnna inkhawm hi Pi Christina Lalnunfeli, SDC chuan kaihruaiin District Bawrhsap Dr. Lalngura Tlau chuan scheme hawnna leh sawi zauna hun a hmang a. He hunah hian line department hotute an tel a ni.