Mizoram Civil Pensioner Association General Assembly vawi 36 na chu vawiin khan Vanapa Hall-ah hman a ni a, Chief Minister Pu Lal Thanhawla chu khuallian a ni. Kum kalta chhunga an member pui mi 136 mual liam ta te sunna hun an hmang hmasa in, President Pu H. Raltawna chuan an association hi sorkar hna lo thawk tawhte awmna, an hnathawh hunlaia nihna an chelh thinte dahbo veka, angkhat veka awmkhawmna a ni a ti.

 

 

Chief Minister chuan pensioner-te chu ram leh sorkar tana an hun thalai zawng zawng hmangzo tu an ni a, an zinga tel theia a awm chu lawmawm a tih thu a sawi a.  An pawl thil tumte zinga khawtlang leh sorkar hmasawnna tura thawhpui tih chu ropui a tih thu a sawi a. Pensioner ten awlsam zawka hlawh an lak theih nan sorkar-in theihtawp a chhuah thu leh bank tam zawk Mizorama lo lut tura sawm an nih thu te a sawi a. Hlawh tam zawkte pawh an lak ve theih nan 6th Central Pay pawh hman thuai tum a ni tiin, angai ang diak diak erawh kan hman ve theih loh tur thu a sawi a. Tunah hian Fitment Committee Report siam that ngai laite pawh Pu H. Liansailova kaihhruainain peihfel thuai a beisei thu a sawi a. Pu Hawla chuan Mizoram sorkar hnuaia hnathawk  zawng zawng hriat theih chu 52,592 an ni a,  pensioner te chu 13,890 vel an nih thu a tarlang bawk. Kumin chhunga sorkar hnathawkte hlawha hman tur chu cheng vaibelchhe 13 leh nuai 6483 a nih tur thu a tarlang. Hetih lai hian sorkar hnathawk zingah thawk tha duhlo leh darkar 2 pawh thawk peihlo, hlawh sang ringawt beisei tam tak an awm thu leh pian kum dik tawklova ziak thahnem tak an awm chu a vanduaithlakin a zahthlak hle a ni a ti a. Sorkar hnathawk tam tak hi rinawm tawklo, kum 60 anga pension,  kum 70 hmel pu si hmuh tur an awm thin chu a pawi hle a ni tiin, siam that tur tam tak hi a siam that hna thawhna ah leh sorkar tha, sorkar fel leh sorkar dik a awm theih nan pensioner-te chu sorkar puibawm thei, mi pawimawh tak an ni a ti. Chief Minister chuan sorkar-in pensioner-te thurawn hi a duh reng a, chung thurawnte chu a tahtawla hman chhoh zel a ni ang a ti bawk.

Pensioner ten sorkar lottery-a judge ni tura an dilna chu Pu Hawla chuan awm a tihpui thu sawiin, sorkar hnathawklai judge a hman chu sum khawhralna leh thil tihawmlova angaih thu a sawi a. Judge ni tura pensioner, sorkara experience lo nei tawhte leh lehkhathiam hna neilo te tan sorkar-in a ngaihtuah mek a ni a ti.

Inkhawm hi MCPA President Pu H. Raltawna’n a kaihruai a. Chawhnu lamah rorelna leh hruaitu thar thlanna an nei bawk a ni.