Mizoram Chief Minister Pu Lal Thanhawla chuan April 22 zan khan CYMA leh Emmanuel Hospital Association (Disaster Management and Mitigation Unit), New Delhi tangkawpin an buatsaih, Mizorama chhiatrupna lo thleng thut thei lo hmachhawn dan tur leh lo inbuatsaih lawk dan tur (Roll-Out Programme of Disaster Preparedness through Training and Capacity Building Project in N.E India) atana inhmuhkhawmna CYMA Hall, Tuikhuahtlanga neih chu a hmanpui.

 

 

 

 

 

 

Chief Minister Pu Lal Thanhawla chuan Mizoram hi chhiatrupna thlen hlauthawn awmna hmun a ni a, a bik takin lirnghing, leimin leh thlipui lakah hian kan him lo zual hle a ni a ti a, heng chhiatrupna lo thlen hun tur hi hriatlawk theih ni lo mahse a lo thlen huna hlawhtling taka kan lo hmachhawn theih nan tun atanga uluk taka inbuatsaihna kalpui hi tihmakmawh a ni a ti. Kan khawpui din kawngah pawh hmathlir kan neih thui tawk loh rah kan seng tan ta mek ni a a hriat thu sawiin rambuai laia ‘sawikhawm’ avangin Aizawlah reilote chhungin raltlan an lo lut vak mai a, hei vang hian Aizawl khawpui pawh duh angin a cheibawl theih tak tak lo a ni a ti. Leilung zir mite chuan Aizawl khawpui hi an zirchian hnuin chhiatna lo thleng thut thei laka an him loh dan azirin hmun nga ah an then a, heti chung pawha Mizoten kan insak dante leh kan ram leilung kan suasam zui duh dan hian ngaih a ti tha lo hle ani, Pathian zahngaihna nasa tak vanga heting chhiatrupna hi la tawng lo mai mai ni a a hriat thu a sawi bawk. Hetih laia Emmanuel Hospital Association leh CYMA chhiatrupna lo thleng thei hmachhawnna kawnga hma la a, kan thalaite training an pe thin chu a lawmawm a tih thu a sawi bawk. Chief Minister chuan chhiatrupna lo thleng thei hmachhawn tura in buatsaihna kawngah thawhpui atan CYMA chu a sawm a, Mizote hi hemi kawnga inzirtirna tha pek kan la ngai hle a, kan tlawmngaihna a tangkai zawng a kan hman a, thuawih leh uluk taka inbuatsaihna tha nei thei turin Sawrkar leh CYMA thawhhona tha a pawimawh hle a ni a ti.

Khual zahawm Pu Nihar Kanti Chakma, Disaster & Rehabilitation Minister pawhin thusawiin Mizoramah kumtin chhiatna chi hrang hrang a thleng thin a, chhiatna zawng zawng a pumpelh theih loh a, mahse chhiatna lo thleng thin ti tlem turin tan kan la thei a ni a ti a, CYMA leh Emmanuel Hospital Association tangkawp te hmalakna leh thahnemngaihna hian chhiatna lo thleng thinte hmachhawn kawngah hmasawnna rah tha a thlen a beisei thu a sawi bawk.

Pu J.H. Zoremthanga CYMA Vice President pawhin Emmanuel Hospital Association leh CYMA tangkawpin hma an lo lak tawh dan te sawiin chhiatna lo thleng thin hmachhawnna kawngah Sawrkar leh CYMA te nasa leh zuala an tanrual zel a beisei thu a sawi.

Dr. Santosh Matthew Thomas, Executive Director Emmanuel Hospital Association pawhin  EHA hmalakna kawng hrang hrangte tarlangin Mizorama kan hriat lar tak ‘SHALOM’ pawh hi EHA hnuaia peng pakhat anih thu a sawi a, tun dinhmunah EHA hi India ram State hrang hrang 14 ah damdawiin 21 neiin an inzarpharh mek a ni a ti a, Mizo thalaite a tam thei ang ber chhiatrupna thleng thei hmachhawn dan zir kawng a tel ve turin a beisei ani tih a sawi.