Vawiin ni 12 May 2016 (Ningani) hian Mizoram Civil Service Association chuan General Conference hmangin, Pu Zodintluanga, Minister, UD & PA in a hmanpui. Kumin MCSA Conference hi vawi 41-na a ni a. Conference-ah hian chaw hma lamah Pu K Laldingliana, Vice President-in a kaihruai.

Pu Zodintluanga, Minister chuan MCS Officer te ram tana theih tawp chhuah turin a fuih a. Ram hmasawnna tura ruahmanna sorkar policy framework duang hna chu MCS officer-te kuta awm a nih vangin ram hmasawnna an kutah a awm thu a sawi a, ram tichangtlungtu turte chu MCS officer te an nih avangin MCS te hnathawh that leh that lohah ram hmasawnna thui tak a in nghat a ni tih a sawi.

Khuallian chuan MCS officer-te chu mipui rawngbawltu an nih angin, mipui te vanga sawrkar hna thawk thei leh hlawh la thei an nih thu a sawi tel a. Chuvangin kan hnathawh hi kan hre chiang hle tur a ni a ti. Mahni awmna post-ah lungawi taka thawk turin a fuih a, hotute hnena mahni awm duhna post dil kual ve sek chi te hi awm theih a nih avangin MCS te chu chutiang lak inthirfihlim turin a chah bawk a ni.

MCS-te chu an service atang reng pawha sawrkar neitu leh hna hrang hrang khawihtu an nih angin mipui tana rawngbawlna kawngah mi te tana biak nuam ni fo turin a chah bawk. Thingtlang mipuite biakpawh leh pan ngam officer nih a tul thu a sawi. Hmasawnna fawng vuantu MCS officer te hian tih tak zeta an thawh chuan Mizoram hian nasa takin hma a sawn dawn a ni a ti.

Chawhnu session hi Pu Lalzirmawia Chhangte, President-in a kaihruai a. Report hrang hrang te ngaihthlak a ni a. Hemi hnu hian rorelna neih a ni. Rorel langsar zualte chu:

1. MCSA Conference-ah hian MCS te chuan Mizoram sawrkarin ei leh bara intodelhna tur New Economic Development Policy kalpui a tum te nasa zawka sawrkar hnathawk ten thlawp tlat turin thu an rel.

2. Sawrkar tha, mipuite sawrkar leh mipuite tana tangkai sawrkar a nih theih nan MCS Officer te chuan Mizoram sawrkarin Good Governance a kalpuinaah thlawp tlat zel turin an infuih bawk.

3. MCS Officer Transfer and Posting Guidelines awmze nei zawka kalpui dan tur chungchang an rel.

4. MCS Officer te hnena Magistrate power pek chungchang hei aia a process awlsam an duh thu te an pass bawk.

5. MCSA Executive Committee-a District Headquarters aiawh officer inruat chungchang an rel.

6. District danga MCSA General Conference neih te an rel.

7. Secretary, Information & Publicity inruat chungchang leh

8. MCS cadre expansion chungchang te an rel.

Vawiina Annual General Conference neihnaah hian MCS Officer-te hian an member zinga boral ta sunna te, MCS lut thar lawmluhna te leh MCS atanga IAS a kai thar lawmpuina hun an hmang tel bawk.

Naktuk ni 13 May 2016 hian Beraw Tourist Complex-ah DP&AR leh MCSA buatsaih One Day Workshop for MCS Officers an hmang chhunzawm bawk ang.