2839/2024-2025

Aizawl, the 5th November, 2024: Vawiin khan Mizoram Cooperative Apex Bank Ltd. (MCAB Ltd.) Board of Directors Meeting chu an Chairman Pu Lalnunsanga kaihhruaiin Board Meeting Room, Head Office, Tuikual South-ah neih a ni.

He hunah hian bank hmalakna hrang hrangte thlir ho niin, MCAB Ltd. branch 30-na turin November thla tawp hian New Colony Branch Siaha-ah hawn ni se tih a ni a. Thawktu indaihlohna avanga hna lak thar (recruitment) exam tura kal meka Assistant Grade (Clerk) 18 lak tura tih chu 27 ah tihsan niin Junior Management Grade (JMG) 2 lak tura tih chu 3 ah tihsan a ni bawk a. Hengte hi December ni 14, 2024 a exam tur a ni ang. Recruitment Exam hi Indian Institute of Banking Management, Guwahati-in an buatsaih thin a ni.

Meeting chuan Special Deposit Scheme thar 'Sekibuhchhuak' ti a vuah chu a pawm bawk a. He Deposit Scheme thar hi kum khata 7.5% a pung niin kum upa tana 8% a punga siam sak a ni.

Tun dinhmunah Apex Bank hian Deposit cheng Vaibelchhia 1539.2 a dawn atangin Loan cheng Vaibelchhia 1206.1 a pe chhuak a. Deposit dawn atanga Loan pekchhuah tehfung (CD Ratio) hi 78.8% a tling a ni.